NSE ડિઝાસ્ટર રિકવરી સાઇટનું લાઇવ ટ્રેડિંગ કરશે

નવી દિલ્હી:નેશનલ સ્ટોક એક્સ્ચેન્જ (NSE)એ સોમવારે જણાવ્યું હતું કે તે પહેલી ઓગસ્ટથી ચેન્નઈ ખાતે તેની ડિઝાસ્ટર રિકવરી સાઇટના બે દિવસના જીવંત ટ્રેડિંગ સત્રનું સંચાલન કરશે. એક્સ્ચેન્જ 29 અને 31મી જુલાઈના રોજ મોક ટ્રેડિંગ યોજશે.

એક્સ્ચેન્જો માટે બધા પ્રકારની ગંભીર સ્થિતિ માટે ડિઝાસ્ટર રિકવરી (ડીઆર) સાઇટ જરૂરી છે, જેથી કોઈ અણધાર્યા ઘટનાક્રમના લીધે મુંબઈ ખાતેના મુખ્ય ટ્રેડિંગ સેન્ટરની કામગીરી પર અસર થાય તો ડિઝાસ્ટર રિકવરી સાઇટ ખાતે તેની કામગીરી અવિરત અને સરળતાથી ચાલતી રહે. એક્સ્ચેન્જે તેના સભ્યોને જણાવ્યું છે કે તેઓ મોક ટ્રેડિંગ સત્રમાં સક્રિય રીતે ભાગ લઈ કનેક્ટિવિટી ચકાસે અને ડીઆર સાઇટ પર લાઇવ ટ્રેડિંગ સત્રમાં લોગઇનની મુશ્કેલીઓ ટાળે.

એનએસઇએ જણાવ્યું હતું કે એક્સ્ચેન્જ ડિઝાસ્ટર રિકવરી સાઇટનું જીવંત સત્ર યોજશે. અગાઉના સૂત્રોએ જણાવ્યું હતું કે સેબી એક્સ્ચેન્જ ટ્રેડિંગ સિસ્ટમ્સ, બેક-અપ એરેન્જમેન્ટ્સ અને ડિઝાસ્ટર રિકવરી પ્લાન્સ માટે ખાસ સમીક્ષા ઇચ્છે છે, તેમા વોલ્યુમમાં આવતા અચાનક ઉછાળાનો પણ સમાવેશ થાય છે.