રોજગારીની ગુણવત્તા માટે આર્થિક સુધારામાં વેગ અનિવાર્ય: OECD

72394030 નવી દિલ્હી:ઓર્ગેનાઇઝેશન ફોર ઇકોનોમિક કો-ઓપરેશન એન્ડ ડેવલપમેન્ટ (OECD)ના જણાવ્યા ભારતીય અર્થતંત્રમાં મધ્યમ રિકવરીનો અંદાજ છે. અનુસાર ટેક્સ પ્રણાલીને સરળ બનાવવાના આર્થિક સુધારા, બિઝનેસના નિયમનમાં ઘટાડો અને ઇન્ફ્રાસ્ટ્રક્ચર અપગ્રેડેશનનાં પગલાંનું પરિણામ મળવાનું શરૂ થયું હોવાથી આગામી સમયમાં રિકવરીની શક્યતા છે. જોકે, OECDએ રોજગારી સર્જન માટે આર્થિક સુધારા અને લોકકલ્યાણનાં પગલાંમાં સુધારો કરવા પર ભાર મૂક્યો હતો.

OECDના ‘ઇકોનોમિક સરવે ઓફ ઇન્ડિયા’ના અહેવાલમાં જણાવ્યા અનુસાર ભારતના ત્રીજા સૌથી મોટા અર્થતંત્રનો વૃદ્ધિદર 2019માં ઘટીને 5.8 ટકા થશે, પણ 2020માં તે રિકવરી સાથે 6.2 ટકા અને 2021માં 6.4 ટકાના સ્તરે પહોંચશે. ઉલ્લેખનીય છે કે, RBIએ ગુરુવારે GDP વૃદ્ધિનો અંદાજ અગાઉના 6.1 ટકાથી ઘટાડી 5 ટકા કર્યો છે. 2018-’19માં ભારતીય અર્થતંત્ર 6.8 ટકાના દરે વધ્યું હતું. જોકે, જુલાઈ-સપ્ટેમ્બરમાં અર્થતંત્રનો વૃદ્ધિદર ઘટીને 4.5 ટકા થયો હતો, જે છ વર્ષમાં સૌથી નીચો છે. એપ્રિલ-જૂન ક્વાર્ટરમાં વૃદ્ધિદર 5 ટકા હતો.

OECDના ચીફ ઇકોનોમિસ્ટ લોરેન્સ બૂને જણાવ્યું હતું કે, “અર્થતંત્રની ધીમી વૃદ્ધિ હાલના આર્થિક સુધારાનો સંપૂર્ણ અમલ કરવાની જરૂરિયાત દર્શાવે છે. ઉપરાંત, ભારતમાં રોકાણ આકર્ષવા અને રોજગારીના સર્જન માટે વેપાર માટેના અવરોધો હળવા કરવા જરૂરી છે.” OECDના અહેવાલમાં જણાવ્યા અનુસાર “છેલ્લાં કેટલાંક વર્ષમાં ભારતે વૈશ્વિક વેપારમાં સક્રિયતા વધારી છે.

જોકે, ખાનગી રોકાણ પ્રમાણમાં નબળું રહ્યું છે અને રોજગારી દર ઘટ્યો છે. ગ્રામીણ આવકમાં સ્થગિતતા નોંધાઈ છે અને વિવિધ રાજ્યોમાં માથા દીઠ આવકમાં ફેરફાર નોંધાયો છે.” અહેવાલમાં વધુમાં જણાવાયું હતું કે, “અર્થતંત્રને વધુ આધુનિક બનાવવા સુધારા જરૂરી છે. જેથી રોજગારી સર્જનને વેગ આપવો જરૂરી છે.” અહેવાલ જારી કરતી વખતે મુખ્ય આર્થિક સલાહકાર ક્રિષ્નમૂર્ત સુબ્રમણિયને જણાવ્યું હતું કે, “આર્થિક વૃદ્ધિદર ઘણો નીચો છે, જેની ભારત પર પણ અસર થઈ છે.”