પેસેન્જર વ્હિકલનું વેચાણ પહેલી વખત 30 લાખે પહોંચ્યું

નવી દિલ્હી:યુટિલિટી વ્હિકલની સારી માંગને પગલે પેસેન્જર વ્હિકલનું વેચાણ 2017માં પહેલી વખત 8.85 ટકાની પાંચ વર્ષની સૌથી ઝડપી વૃદ્ધિ સાથે 30 લાખની સપાટીને વટાવી ગયું છે. SIAMના આંકડા પ્રમાણે 2017માં પેસેન્જર વ્હિકલનું વેચાણ 32,29,109 યુનિટ્સ થયું છે, જે 2016માં 29,66,603 યુનિટ્સ હતું.

ચાલુ નાણાકીય વર્ષનાં પ્રથમ ત્રણ ક્વાર્ટરમાં વેચાણમાં સતત વધારો નોંધાયો છે. SIAMએ 2017-18 માટે પેસેન્જર વ્હિકલની વૃદ્ધિનો અંદાજ અગાઉના 7-9 ટકાથી વધારી 9 ટકા કર્યો છે.

2017માં પેસેન્જર વ્હિકલ સેગમેન્ટમાં કારનું વેચાણ સૌથી વધુ 21,68,151 યુનિટ્સ રહ્યું છે, જે 2016ના 20,62,357 યુનિટ્સની તુલનામાં 5.12 ટકા વૃદ્ધિ દર્શાવે છે. ખાસ કરીને 2017માં યુટિલિટી વ્હિકલ્સનું વેચાણ નોંધપાત્ર ઊછળી 8,70,060 યુનિટ્સ થયું છે, જે 2016ના 7,24,522 યુનિટ્સની તુલનામાં 20.09 ટકાની વૃદ્ધિ દર્શાવે છે. ટુ-વ્હિલરનું વેચાણ પણ 8.43 ટકા વધીને 1,91,76,905 યુનિટ્સે પહોંચ્યું છે.

SIAMના ડેપ્યુટી ડિરેક્ટર જનરલ સુગાતો સેને જણાવ્યું હતું કે, 2017માં સ્થાનિક બજારમાં પહેલી વખત 32 લાખ પેસેન્જર વ્હિકલ્સ વેચાયાં છે. ગયા વર્ષે ટુ-વ્હિલરનું 1.9 કરોડનું વિક્રમ વેચાણ થયું છે. ગયા વર્ષે પેસેન્જર વ્હિકલનું વેચાણ 2012 પછી સૌથી ઝડપી 9.77 ટકા રહ્યું હતું. SIAMના જણાવ્યા અનુસાર 2017માં કોમર્શિયલ વ્હિકલ્સ અને ટુ-વ્હિલર્સ સહિત વિવિધ કેટેગરીનું વેચાણ 8.39 ટકા વધીને 2,37,39,780 યુનિટ્સ થયું છે.

સેને જણાવ્યું હતું કે, ચાલુ નાણાકીય વર્ષના પ્રથમ ત્રણ ક્વાર્ટરમાં સારી કામગીરીને પગલે SIAMએ પેસેન્જર વ્હિકલ સેગમેન્ટની વૃદ્ધિનો અંદાજ વધારી 9 ટકા કર્યો છે. કોમર્શિયલ વ્હિકલની વૃદ્ધિનો અંદાજ અગાઉના 4-6 ટકાથી વધારી 13 ટકા અને ટુ-વ્હીલરનો અંદાજ 9-11 ટકાથી વધારી 12 ટકા કરવામાં આવ્યો છે.

પેસેન્જર વ્હિકલનું વેચાણ 2016-17માં 9.23 ટકા, કોમર્શિયલ વ્હિકલનું 4.16 ટકા અને ટુ-વ્હીલરનું વેચાણ 6.89 ટકા વધ્યું હતું. સેને જણાવ્યું હતું કે, કોમર્શિયલ વ્હિકલ સિવાય ઓટો ઉદ્યોગ નોટબંધીની અસરમાંથી બહાર નીકળવામાં સફળ રહ્યો છે.

તેમણે કહ્યું હતું કે, SIAMને GSTની મોટા ભાગની સમસ્યાનો ઉકેલ માર્ચ સુધીમાં આવે તેવી શક્યતા છે. ડિસેમ્બરમાં પેસેન્જર વ્હિકલનું વેચાણ 5.22 ટકા વધીને 2,39,712 યુનિટ્સ થયું છે, જે 2016માં 2,27,823 યુનિટ્સ હતું. જોકે, સ્થાનિક કારનું વેચાણ સાધારણ ઘટીને 1,58,326 યુનિટ્સ થયું છે, જે ડિસેમ્બર 2016માં 1,58,617 યુનિટ્સ હતું.

ડિસેમ્બરમાં ટુ-વ્હિલરનું કુલ વેચાણ 41.45 ટકા વધીને12,87,592 યુનિટ્સ થયું છે. ગયા મહિને મોટરસાઇકલનું વેચાણ 40.31 ટકાની વૃદ્ધિ સાથે 7,88,156 યુનિટ્સ નોંધાયું છે. સ્કૂટર્સ સેગમેન્ટનું વેચાણ 52.05 ટકા વધીને 4,32,429 યુનિટ્સ થયું છે, જે અગાઉના વર્ષના સમાન ગાળામાં 2,84,405 યુનિટ્સ હતું. કોમર્શિયલ વ્હિકલનું વેચાણ 52.62 ટકા વધીને 82,362 યુનિટ્સ થયું છે. ]]>