મેન્યુફેક્ચરિંગ PMI જૂનમાં ઘટીને 52.1

70035142 નવી દિલ્હી:ઓર્ડરમાં ધીમી વૃદ્ધિને કારણે મેન્યુફેક્ચરિંગ સેક્ટરે મોમેન્ટમ ગુમાવ્યું છે. તેને લીધે જૂનમાં નિકાઇ ઇન્ડિયા મેન્યુફેક્ચરિંગ પરચેઝિંગ મેનેજર્સ ઇન્ડેક્સ ઘટીને 52.1 થયો છે, જે મે મહિનામાં 52.7 હતો. IHS માર્કિટના પ્રિન્સિપાલ ઇકોનોમિસ્ટ પોલિઆના દિ લિમાએ જણાવ્યું હતું કે, “PMI ડેટા સૂચવે છે કે જૂનમાં ભારતના મેન્યુફેક્ચરિંગ સેક્ટરની વૃદ્ધિ થોડી ધીમી પડી છે.”

જૂન મહિનામાં નવા નિકાસ ઓર્ડર ઘટ્યા છે. કન્ઝ્યુ ગૂડ્ઝમાં તીવ્ર વૃદ્ધિ થઈ છે. જોકે, ઇન્ટરમીડિયેટ અને કેપિટલ ગૂડ્ઝમાં માત્ર થોડો સુધારો નોંધાયો છે. આગામી સમયમાં મેન્યુફેક્ચરિંગ ક્ષેત્રે રિકવરીનો સ્પષ્ટ સંકેત જોવા નહીં મળે તો સેક્ટરમાં રોજગારી સર્જન અટકી જવાની આશંકા છે. 2018-’19માં મેન્યુફેક્ચરિંગ સેક્ટરની વૃદ્ધિ 6.9 ટકા રહી હતી, જે 2017-’18ના 5.9 ટકા કરતાં વધુ હતી.

મેન્યુફેક્ચરિંગ સેક્ટરની ધીમી વૃદ્ધિ RBIના ચાલુ નાણાકીય વર્ષના પ્રથમ અર્ધવાર્ષિક ગાળાની 6.4-6.7 ટકાની GDP વૃદ્ધિ સાથે બંધબેસતી છે. ઉલ્લેખનીય છે કે, RBIએ જૂનમાં આર્થિક વૃદ્ધિના અગાઉના 7.2-7.5 ટકાના અંદાજમાં ઘટાડો કર્યો હતો. ગયા મહિને RBIએ ચાલુ વર્ષે ત્રીજી વખત રેપો રેટ 0.25 ટકા ઘટાડ્યો હતો. લિમાએ કહ્યું હતું કે, “કંપનીઓએ ડિસ્કાઉન્ટ ઓફર્સ દ્વારા વેચાણ વધારવાનો પ્રયાસ કર્યો હતો.”