સર્વિસિસ સેક્ટરમાં રિકવરીનો સંકેત, PMI 52.7

72377709 નવી દિલ્હી:સર્વિસિસ સેક્ટરે નવેમ્બરમાં થોડો પ્રત્યાઘાતી સુધારો દર્શાવ્યો છે. નવા બિઝનેસ ઓર્ડર, ઝડપી રોજગારી સર્જન અને બિઝનેસ કોન્ફિડન્સમાં વૃદ્ધિને કારણે નવેમ્બરમાં સર્વિસિસ PMI 52.7ના સ્તરે પહોંચ્યો છે, જે ઓક્ટોબરમાં 49.2 હતો. IHS માર્કિટ ઇન્ડિયા સર્વિસિસ બિઝનેસ એક્ટિવિટી ઇન્ડેક્સે ત્રણ મહિનામાં પહેલી વખત આઉટપુટમાં વૃદ્ધિનો સંકેત આપ્યો છે.

PMIમાં 50ની ઉપરનો આંક વૃદ્ધિ અને 50 નીચેનો સ્તર ઘટાડો દર્શાવે છે. IHS માર્કિટના પ્રિન્સિપાલ ઇકોનોમિસ્ટ પોલિઆના દિ લિમાએ જણાવ્યું હતું કે, “સર્વિસિસ સેક્ટરે સપ્ટેમ્બર અને ઓક્ટોબરની નબળાઈને અમુક અંશે ખંખેરી છે. જોકે, PMIનો તાજેતરનો આંકડો માંગ અંગે થોડી સાવચેતી અને સેક્ટરની સ્થિતિનો ખ્યાલ આપે છે.” સર્વિસિસ સેક્ટરમાં પ્રત્યાઘાતી સુધારાનું કારણ માંગમાં રિકવરી, ટેક્‌નોલોજીમાં સુધારો અને ગ્રાહકોની સંખ્યામાં વૃદ્ધિ છે. ગ્રાહક આધારિત સેવાઓ, ઇન્ફર્મેશન એન્ડ કોમ્યુનિકેશન, રિયલ એસ્ટેટ અને બિઝનેસ સર્વિસિસમાં વૃદ્ધિને કારણે સર્વિસિસમાં થોડું વિસ્તરણ જોવા મળ્યું છે.

PMI સર્વિસિસ એક્ટિવિટી ઇન્ડેક્સ 400થી વધુ સર્વિસ પ્રોવાઇડર્સના ખરીદી સાથે સંકળાયેલા એક્ઝિક્યુટિવ્સના સરવે પર આધારિત છે. જેમાં કન્ઝ્યુ સર્વિસિસ, ટ્રાન્સપોર્ટ એન્ડ સ્ટોરેજ, ઇન્ફર્મેશન એન્ડ કોમ્યુનિકેશન, ફાઇનાન્શિયલ એન્ડ ઇન્શ્યોરન્સ તેમજ રિયલ એસ્ટેટ એન્ડ બિઝનેસ સર્વિસિસ કેટેગરીનો સમાવેશ થાય છે.

ભારતના સર્વિસિસ સેક્ટરમાં ફાઇનાન્સ અને ઇન્શ્યોરન્સ સિવાયના સેગમેન્ટમાં રોજગારી વધી છે. દિ લિમાએ જણાવ્યું હતું કે, “સર્વિસિસ સેક્ટરનું વેચાણ અને પ્રવૃત્તિ અગાઉના આંકડાની તુલનામાં મંદ રહ્યાં છે. તેની સાથે બિઝનેસ કોન્ફિડન્સમાં પણ મોટો વધારો થયો નથી.”

ઉલ્લેખનીય છે કે, સોમવારે મેન્યુફેક્ચરિંગ PMIમાં પણ સુધારાનો સંકેત નોંધાયો છે. ફેક્ટરી અને સર્વિસિસ સેક્ટરની પ્રવૃત્તિમાં સંયુક્ત વૃદ્ધિને કારણે ભારતના ખાનગી ક્ષેત્રના આઉટપુટમાં ગયા મહિને પ્રત્યાઘાતી સુધારો નોંધાયો છે. કોમ્પોઝિટ PMI આઉટપુટ ઇન્ડેક્સ 49.6થી વધીને 52.7 થયો છે, જે ધીમી વૃદ્ધિ દર્શાવે છે. ઉલ્લેખનીય છે કે, તાજેતરમાં GDP વૃદ્ધિનો દર 4.5ટકાની છ વર્ષની નીચી સપાટીએ પહોંચ્યો હતો.