કોરોનામાં ધંધો ડાઉન થતાં પ્રાઈવેટ બેંકોએ ભાડામાં 20 ટકા ઘટાડો માગ્યો

મુંબઈ: ઈન્દોરમાં HDFC બેંકને પોતાનું ચાર માળનું બિલ્ડિંગ ભાડે આપનારા મકાનમાલિકને બેંકે ભાડાનો જે ચેક આપ્યો, તેમાં રકમ 20 ટકા ઓછી હતી. હાલના સમયમાં મકાનમાલિક પાસે તે ચેક સ્વીકારવા સિવાય કોઈ ઓપ્શન પણ નહોતો, કારણકે તેના માટે ચારેય માળ ભાડે લઈ શકે તેવો ભાડુઆત અત્યારે શોધવો લગભગ અશક્ય છે.

સૂત્રોનું માનીએ તો, HDFC બેંકે પોતાની તમામ ઓફિસોના ભાડાંમાં 20 ટકાનો ઘટાડો કરવા માટે મકાનમાલિકોને જણાવ્યું છે. જો ભાડું ના ઘટાડાયું તો બેંક મકાન ખાલી કરી નાખશે તેમ પણ કહી દેવાયું છે. 2019-20માં HDFCએ 1,658.7 કરોડ રુપિયા ઓફિસના ભાડાં ઉપરાંત વીજળીના બિલ અને લોકલ ટેક્સ તરીકે ચૂકવ્યા હતા. જે તેના અગાઉના નાણાંકીય વર્ષ કરતા 176.37 કરોડ રુપિયા વધારે હતા. HDFC બેંકની દેશમાં 5,416 બ્રાંચ છે, અને 14,901 એટીએમ આવેલા છે.

એક સૂત્રએ પોતાનું નામ ના આપવાની શરતે જણાવ્યું હતું કે, બેંકોને કર્મચારીઓના પગાર અને આઈટી ઈન્ફ્રાસ્ટ્ર્કચર બાદ ત્રીજો સૌથી વધારે ખર્ચો ભાડાં ચૂકવવાનો હોય છે. માત્ર HDFC જ નહીં, પરંતુ અન્ય પ્રાઈવેટ બેંકો પણ કોરોનાને કારણે સર્જાયેલી સ્થિતિ બાદ ભાડાંમાં ઘટાડાની માગ કરી રહી છે. હાલમાં જ ICICI બેંકે પણ લોકડાઉનના પિરિયડ દરમિયાનનું ભાડું ઓછું લેવા રજૂઆત કરી છે. ICICIની દેશમાં 5300 જેટલી બ્રાંચ અને 15000 એટીએમ છે, અને તેણે 2019-20 દરમિયાન 1200 કરોડ રુપિયા ભાડા, વીજળી બિલ અને ટેક્સ પેટે ચૂકવ્યા હતા.

પ્રોપસ્ટેક નામની એક ડેટાએનાલિટિક્સ ફર્મના જણાવ્યા અનુસાર, ICICI, HDFC, એક્સિસ, ઈન્ડસઈન્ડ, કોટક મહિન્દ્રા, આરબીએપ, આઈડીએફસી ફર્સ્ટ બેંકે 2019-20માં 4,000 કરોડ રુપિયા જેટલું ભાડું ચૂકવ્યું હતું. આ તમામ બેંકો આ વર્ષે તેમાં 15-20 ટકા જેટલો ઘટાડો કરવા માગે છે. HDFCના એક અધિકારીએ જણાવ્યું હતું કે તેઓ મકાનમાલિકો સાથે આ અંગે વાત કરી રહ્યા છે. જો કે ભાડું નહીં ઘટે તો ઓફિસ ખાલી કરી દેવાની વાત થઈ હોવાનો તેમણે ઈનકાર કર્યો હતો. તેમણે જણાવ્યું હતું કે ભાડાંકરાર અનુસાર કોઈપણ પાર્ટી તેમ ના કરી શકે.