ખાનગી ક્ષેત્રના કર્મચારીઓ પણ 20 લાખ સુધીની ગ્રેચ્યુઈટી ઉપાડી શકશે

ખાનગી સંગઠિત ક્ષેત્રના કર્મચારીઓ માટે મોટી રાહતરૂપ સમાચાર છે. તેમના માટે ટૂંક સમયમાં ટેક્સ ફ્રી ગ્રેચ્યુઈટી ઉપાડવાની મર્યાદા ૨૦ લાખ રૂપિયા સુધીની થઈ જશે. કેન્દ્રીય ટ્રેડ યુનિયન ગ્રેચ્યુઈટીના કાયદામાં સુધારા અંગે ત્રિપક્ષીય બેઠકમાં વચગાળાના ઉપાય તરીકે ગ્રેચ્યુઈટી ઉપાડની મર્યાદા બમણી કરી દેવા સંમત થઈ ગયું છે. આ સુધારા પછી દેશના સરકારી કર્મચારીઓની જેમ ખાનગી ક્ષેત્રના કરોડો કર્મચારીઓને પણ ૨૦ લાખ રૂપિયા સુધી ગ્રેચ્યુઈટી ઉપાડવાનો લાભ મળશે. બેઠકમાં શ્રમ મંત્રી બંડારુ દત્તાત્રેયે ગ્રેચ્યુઈટી ૨૦ લાખ રૂપિયા કરવા અંગે સંમતિ દર્શાવી હતી. દિલ્હીમાં ગુરુવારે શ્રમ મંત્રાલયના અધિકારીઓ અને રાજ્યો, કર્મચારીઓ અને કંપનીઓના કર્મચારીઓના પ્રતિનિધિઓની બેઠક યોજાઈ હતી, જેમાં સર્વસંમતિથી આ નિર્ણય લેવાયો હતો.

હાલમાં નિયમ શું છે?
હાલમાં ખાનગી ક્ષેત્રના કર્મચારીઓ ૧૦ લાખ રૂપિયાથી વધુની રકમ ગ્રેચ્યુઈટી પેટે જમા થઈ હોય તો પણ મહત્તમ ૧૦ લાખ રૂપિયા જ ઉપાડી શકે છે, જ્યારે સરકારી કર્મચારીઓ માટે આ મર્યાદા ૨૦ લાખ રૂપિયાની છે. કોઈપણ વ્યક્તિને ગ્રેચ્યુઈટી પાંચ વર્ષ સુધી સતત કોઈ કંપનીમાં કામ કર્યા પછી ગ્રેચ્યુઈટીનો લાભ મળતો હોય છે. લેબર યુનિયને માંગ કરી હતી કે આ સમયમર્યાદા ઘટાડીને એક વર્ષ કરવી જોઈએ.