મેન્યુફેક્ચરિંગના ઊંચા અંદાજથી Q1 GDP વધુ રહ્યો: ધોળકિયા

65697780 આર્થિક વૃદ્ધિની ગણતરી કરતી વખતે મેન્યુફેક્ચરિંગ આઉટપુટનો અંદાજ વધુ પડતો આંકવામાં આવ્યો હોવાનો મત RBIની મોનેટરી પોલિસી કમિટી (MPC)ના સભ્ય રવિન્દ્ર ધોળકિયાએ વ્યક્ત કર્યો છે. તાજેતરમાં જાહેર થયેલા આંકડામાં ભારતીય અર્થતંત્રનો પ્રથમ ક્વાર્ટર (એપ્રિલ-જૂન)નો વૃદ્ધિદર 8.2 ટકા રહ્યો છે.

ઇકોનોમિક એન્ડ પોલિટિકલ વીકલીમાં છપાયેલા ધોળકિયા તેમજ આર નાગરાજ અને મનિષ પંડ્યાના લેખમાં જણાવ્યા અનુસાર “મેન્યુફેક્ચરિંગ વેલ્યૂ એડેડના અંદાજ માટે એન્યુઅલ સરવે ઓફ ઇન્ડસ્ટ્રીઝનું સ્થાન મહદ્અંશે નવી GDP સિરીઝે લીધું છે. તેને લીધે GDPમાં મેન્યુફેક્ચરિંગનો હિસ્સો વધ્યો છે અને જૂની સિરીઝની તુલનામાં ઝડપી વૃદ્ધિ નોંધાઈ છે.”

ઉલ્લેખનીય છે કે, શુક્રવારે જાહેર થયેલા સત્તાવાર આંકડામાં એપ્રિલ-જૂન ક્વાર્ટરમાં મેન્યુફેક્ચરિંગ સેક્ટરની વૃદ્ધિ 13.5 ટકા રહી હતી અને આર્થિક વૃદ્ધિદર 8.2 ટકા નોંધાયો હતો, જે મોટા અર્થતંત્રોમાં સૌથી વધુ છે. નાણાપ્રધાન અરુણ જેટલીએ ઊંચી આર્થિક વૃદ્ધિ માટે સરકારના આર્થિક સુધારા અને નાણાકીય શિસ્તને જવાબદાર ગણાવી હતી.

ધોળકિયા અને અન્ય નિષ્ણાતોએ લખ્યું છે કે, “નવી સિરીઝ મેન્યુફેક્ચરિંગ વેલ્યૂ એડેડનું સંપૂર્ણ પ્રતિનિધિત્વ રજૂ કરે છે કે અંદાજ વધુ પડતો છે?” ધોળકિયાના જણાવ્યા અનુસાર “મેન્યુફેક્ચરિંગ સેક્ટરનો ઊંચો વૃદ્ધિદર નવા અંદાજ અંગે ગંભીર આશંકા ઊભી કરે છે.

ઉપરાંત, અન્ય મેક્રોઇકોનોમિક ફંડામેન્ટલ્સ સાથે તે બંધબેસતા નથી.” રિઝર્વ બેન્કે સમગ્ર વર્ષ માટે 7.4 ટકાની વૃદ્ધિનો અંદાજ જાળવ્યો છે, પણ ક્રૂડના ઊંચા ભાવ અને ટ્રેડ વોરને કારણે કરન્સી પર દબાણને જોખમ ગણાવ્યું છે. ઉલ્લેખનીય છે કે, ધોળકિયા વૃદ્ધિને ટેકો આપવા વ્યાજદરમાં ઘટાડાની તરફેણ કરતા રહ્યા છે. ઓગસ્ટમાં વ્યાજદર અંગેની MPCની બેઠકમાં વ્યાજદરમાં વૃદ્ધિનો વિરોધ કરનારા તે એક માત્ર સભ્ય હતા.
]]>