બજાજ ફાઇનાન્સનો Q2 ચોખ્ખો નફો 63% વધ્યો

71715353 મુંબઇ:એનબીએફસી સેક્ટરમાં નરમાઇનો માહોલ હોવા છતાં બીજા ક્વાર્ટરમાં બજાજ ફાઇનાન્સે તીવ્ર વૃધ્ધિદર જા‌ળવી રાખ્યો હતો. જોકે મેનેજમેન્ટે ટુ વ્હિલર્સ જેવાં કેટલાંક સેક્ટર્સમાં લોનમાં સમસ્યા હોવાની ચેતવણી આપી હતી. નાણાં મંત્રી નિર્મલા સીતારામને સપ્ટેમ્બર મહિનામાં કોર્પોરેટ ટેક્સમાં ઘટાડો કરતાં બીજા ત્રિમાસિક ગાળામાં કંપનીનો નફો 63 ટકા વધીને ₹1506 કરોડ થયો હતો.

આ લાભને બાદ કરતાં 43 ટકાની વૃધ્ધિ રહી હતી. એસેટ ક્વોલિટી સ્થિર રહી હતી, જેમાં ગ્રોસ એનપીએ 1.61 ટકા અને નેટ એનપીએ 0.65 ટકા રહી હતી. પ્રોવિઝન કવરેજ રેશિયો 60 ટકા હતો. કન્ઝ્યુમર લોન્સ અને ઓટો ફાઇનાન્સમાં મજબૂત વૃધ્ધિથી પણ કંપનીને લાભ થયો હતો. જોકે કંપનીના સીઇઓ અને એમડી રાજીવ જૈન અર્નિંગ કોલમાં થોડા નાખુશ જણાતા હતા.

જૈને જણાવ્યું હતું કે, ક્વાર્ટર દરમિયાન લોનની માગ જટિલ હતી. અમે ગ્રોથ ઓરિએન્ટેડ રહ્યા હતા. અમે કુશળ રહેવાની સાથે અમારા પોર્ટફોલિયો મેટ્રીક્સનું પણ નીરિક્ષણ કરીએ છીએ. બીએસઇ પર કંપનીનો શેર 2.56 ટકા ઘટીને ₹4031 રહ્યો હતો. જૈને નરમ વૃધ્ધિ અને લાઇફસ્ટાઇલ બિઝનેસમાં જોખમ અંગે ચેતવણી આપી હતી.
લાઇફસ્ટાઇલ બિઝનેસમાં ફર્નિચર, ઇન્ટિરિયર ડેકોરેશન વગેરે માટેની લોનનો સમાવેશ થાય છે. ગયા ક્વાર્ટરમાં તેમણે ટુ વ્હિલર્સ અને સ્માર્ટફોન્સ જેવા ડિજિટલ બિઝનેસ અંગે પણ આ પ્રકારની ચેતવણી આપી હતી. કદાચ એટલા માટે જ ₹196 કરોડની સામે ₹293 કરોડના ઊંચા રાઇટ-ઓફને કારણે ધિરાણ ખર્ચ વધ્યો હતો.

એસેટ ક્વોલિટીના અન્ય માપદંડો સ્થિર રહ્યા હતા, જેમાં પીસીઆર અથવા તો પ્રોવિઝન કવરેજ રેશિયો 60 ટકા હતો. બજાજ વિદેશમાંથી નાણાં એકત્ર કરી રહી છે અને તેનાથી કોસ્ટ ઓફ ફન્ડ 8.5 ટકાથી ઘટાડીને 8.38 ટકા કરવામાં મદદ મળી છે. વિદેશી લોન 7.9 ટકા હતી જે બેન્કો પાસેથી ઋણ કરતાં નીચી છે. “ચોથા ક્વાર્ટરમાં ખર્ચ 8.25 ટકા થવાની અમારી ધારણા છે,” એમ જૈને જણાવ્યું હતું.

બજાજની એસેટ્સ અન્ડર મેનેજમેન્ટ 38 ટકા વધીને ₹ 1.35 લાખ કરોડ થઇ હતી, જ્યારે ગ્રોથ રેટ અગાઉના વર્ષના સમાન ક્વાર્ટર જેટલો જ રહ્યો હતો. કંપની મૂડી એકત્ર કરવા ક્યુઆઇપી દ્વારા ₹8500 કરોડ એકત્ર કરવાની યોજના ધરાવે છે.