RBIના નવા નિયમના કારણે સોનાના ઘરેણા પર વધુ લોન મેળવી શકાશે

કોરોના વાયરસ અને તેના કારણે નોકરી-ધંધા અને વ્યવસાય પર માઠી અસર પડી છે. આવામાં લોકડાઉન અને નોકરીઓ ગુમાવવાના કારણે ઘણાં પરિવારોની હાલત કફોડી બની ગઈ છે. આવામાં હવે લોકો પોતાની બચત પૂર્ણ થઈ જતાં નવી શરુઆત કરવા માટે લોન લઈ રહ્યા છે. આના માટે ઘરેણા ગીરવે મૂકી રહ્યા છે. આવામાં ઘરે ગીરવે મૂકીને લોન લેનારા લોકો માટે સારા સમાચાર આવ્યા છે. RBI દ્વારા ગોલ્ડની કિંમત સામે લોનની રકમના ધોરણને હળવું બનાવ્યું છે. જેનો સીધો ફાયદો ગોલ્ડ લોન લેનારા લોકોને થઈ શકે છે.

અગાઉ ગોલ્ડ લોન લેવા પર સોનાની મૂળ કિંમતના 75 ટકા લોન મળતી હતી જોકે, કેટલાક ફેરફારોના કારણે તેનો ફાયદો અરજદારોને થઈ શકશે. એટલે કે હવે સોના પર લોન લેનારા લોકોને તેની મૂળ કિંમતના 90% લોન મળી શકશે, જે અગાઉ બિનૃ-કૃષિ હેતુ માટે 75% જ હતી. જોકે, આ માટે સમય મર્યાદા પણ નક્કી કરવામાં આવી છે.

RBIની મોનિટરી પોલિસી કમિટી નવા ધોરણ પ્રમાણે સોના પર 90% લોન 31 માર્ચ 2021 સુધી મળવા પાત્ર રહેશે. જે પછી 1 એપ્રિલ 2021થી ફરી 75% લોનવાળું ધોરણ લાગુ થઈ જશે. કોરોના વાયરસના કારણે ઉભી થયેલી કપરી સ્થિતિમાં આ નવું ધોરણ વધારે ફાયદારુપ સાબિત થશે તેમ માનવામાં આવી રહ્યું છે.

હાલમાં સોનાની કિંમતમાં પણ ઉછાળો આવ્યો છે તેવામાં આર્થિક મદદ લેવા ઈચ્છતા લોકોને ગોલ્ડ લોનથી ફાયદો થવાની સંભાવના વ્યક્ત કરવામાં આવી રહી છે. આ સાથે માનવામાં આવે છે કે, ભરપૂર પ્રમાણમાં લિક્વિડિટી ધરાવતી બેંકો સાથે નાણાં સંસ્થાઓ માટે વધુ ધિરાણ પૂરું પાડવું લાભદાયક સાબિત થશે. બીજી તરફ પોતાની લોનની રકમમાં સામાન્ય ઘટાડો કરવા માટે વધુ સોનું ગીરવે મૂકવાની સ્થિતિ ઉભી નહીં થાય.

દેશમાં કુદકેને ભુસકે કોરોના વાયરસના કેસમાં ઉછાળો આવી રહ્યો છે. આવામાં દેશમાં કોરોના વાયરસના કુલ કેસનો આંકડો 20 લાખને પાર પહોંચી ગયો છે. જ્યારે પાછલા 8 દિવસથી દેશમાં 50,000 કરતા વધારે પોઝિટિવ કેસ નોંધાઈ રહ્યા છે. આવામાં આર્થિક રીતે બેઠા થવાના પ્રયાસ કરી રહેલા લોકોને આ ગોલ્ડ લોનથી ફાયદો થઈ શકે છે.