RBIએ FY20નો GDPનો અંદાજ ઘટાડીને 5% કર્યો

72382080 નવી દિલ્હી: બીજા ક્વાર્ટરમાં દેશ જીડીપી દર 4.5 ટકાના છ વર્ષના તળિયે આવી ગયા બાદ રિઝર્વ બેન્ક ઓફ ઈન્ડિયાએ ગુરુવારે ચાલુ નાણાકીય વર્ષ માટેનો જીડીપીનો અંદાજ ઘટાડીને 5 ટકા કર્યો હતો.

ઓક્ટોબર પોલિસીમાં RBIએ ચાલુ નાણાકીય વર્ષે 6.1 ટકાનો વિકાસદરનો ટાર્ગેટ દર્શાવ્યો હતો.

મધયસ્થ બેન્કે જણાવ્યું હતું કે, જુલાઈ-સપ્ટેમ્બરમાં જીડીપીનો દર અગાઉના અંદાજ કરતાં ઘણો નીચો રહ્યો હતો. હાલમાં વિવિધ ઈન્ડિકેટર્સ પણ ઘરઆંગણે તેમજ વિદેશમાં માંગ નરમ રહેવાનો સંકેત આપે છે.

RBIએ તેના નિવેદનમાં જણાવ્યું હતું કે, “લિક્વિડિટીની સ્થિતિ અને વૈશ્વિક સ્તરે ટ્રેડવોરના તણાવનો ઝડપી ઉકેલ ગ્રોથમાં સુધારો લાવી શકે છે પણ ઘરઆંગણે માંગમાં સુધારાનો વિલંબ, ઈકોનોમીમાં સ્લોડાઉન તેમજ ભૂ-રાજકીય તણાવને કારણે જીડીપીમાં વધુ ઘટાડાનું જોખમ રહેલું છે.”

જોકે, મધ્યસ્થ બેન્કે ચાલુ નાણાકીય વર્ષના ચોથા ક્વાર્ટરમાં બિઝનેસ સેન્ટિમેન્ટમાં સાધારણ સુધારાની આશા પણ વ્યક્ત કરી હતી.

મોનેટરી પોલિસી કમિટી (MPC)એ નોંધ્યું હતું કે, આર્થિક પ્રવૃત્તિ નરમ પડી છે અને આઉટપુટ ગેપ પણ નેગેટિવ રહ્યો હતો.

“સરકારના કેટલાંક પગલાં અને નાણા નીતિ હળવી કરવા સહિતના RBIના પગલાંની અસર અર્થતંત્રમાં તબક્કાવાર રીતે જોવા મળશે.”તેમ મધ્યસ્થ બેન્કે જણાવ્યું હતું.