RILએ રૂ.413 કરોડમાં બાલાજી ટેલિફિલ્મ્સમાં 25% હિસ્સો ખરીદ્યો

નવી દિલ્હી: મુકેશ અંબાણીની રિલાયન્સ ઇન્ડસ્ટ્રીઝ લિ (RIL)એ જણાવ્યું છે કે, કંપનીના બોર્ડે લગભગ રૂ.413 કરોડમાં બાલાજી ટેલિફિલ્મ્સના 2.52 કરોડ શેર ખરીદીને લગભગ 25 ટકા હિસ્સો ખરીદવા માટે મંજૂરી આપી દીધી છે. RILએ BSEને પાઠવેલા નિવેદનમાં જણાવ્યું હતું કે, બોર્ડે બાલાજી ટેલિનો 24.92 ટકા હિસ્સો ખરીદવા માટેનું રોકાણ કરવાની મંજૂરી આપી છે.

બાલાજી ટેલિફિલ્મ્સે પણ અન્ય એક નિવેદનમાં જણાવ્યું હતું કે, તેના બોર્ડે આજે RIL દ્વારા પ્રતિ શેર રૂ.164ના ભાવે 2.52 કરોડ ઇક્વિટી શેરના પ્રેફરન્શિયલ ઇશ્યૂ દ્વારા રોકાણની વિચારણા કરી હતી અને મંજૂરી આપી હતી. જોકે, આ સોદો બાલાજી ટેલિના શેરહોલ્ડર અને અન્ય નિયમનકારી મંજૂરીને આધીન છે. ગુરુવારે બાલાજી ટેલિનો શેર 1.74 ટકા ઘટીને રૂ.186.65એ બંધ રહ્યો હતો, જે પ્રમાણે RILએ ડિસ્કાઉન્ટ ભાવે ખરીદી કરી છે.

મુંબઈ સ્થિત મીડિયા અને એન્ટરટેઇન્મેન્ટ કંપની બાલાજી ટેલિફિલ્મ્સ આ હિસ્સો વેચવાથી જે રકમ મળશે તેનો ઉપયોગ કન્ટેન્ટ ડેવલપમેન્ટ માટે અને ખાસ તો, તેના ઓવર-ધી-ટોપ (OTT) કન્ટેન્ટ પ્લેટફોર્મ ALTBalaji માટે કરશે.

કંપની આ કવાયત કરીને વિદેશના તથા ભારતના OTT સર્વિસ પ્રોવાઇડરને મજબૂત સ્પર્ધા પૂરી પાડશે. બાલાજી ટેલિફિલ્મ્સના ચેરમેન જિતેન્દ્ર કપૂરે તેમની વૃદ્ધિની સફરમાં RILને ભાગીદાર તરીકે આવકારી હતી.

બાલાજી ટેલિફિલ્મ્સે ગઈકાલે જણાવ્યું હતું કે, તેના OTT કન્ટેન્ટ પ્લેટફોર્મ ALTBalajiમાં હિસ્સો ખરીદવા માટે કેટલાક ફાઇનાન્શિયલ અને સ્ટ્રેટેજિક રોકાણકારોએ ગંભીરપણે રસ દર્શાવ્યો છે. ]]>