રિલાયન્સનું માર્કેટકેપ પહેલી વાર રૂ.5 લાખ કરોડની ઉપર

નવી દિલ્હી:રિલાયન્સ ઇન્ડસ્ટ્રીઝના શેરે પહેલી વખત રૂ.5 લાખ કરોડનું માર્કેટ કેપ વટાવ્યું છે. તે આ સીમાચિહ્ન હાંસલ કરનારી TCS પછીની માત્ર બીજી કંપની બની છે. સોમવારે રિલાયન્સનો શેર બીએસઇ પર 1.33 ટકા વધીને રૂ.1,551.35ના મથાળે બંધ રહ્યો હતો. જેના આધારે તેનું માર્કેટ કેપ રૂ.5,04,458.09 કરોડે પહોંચ્યું છે. ઇન્ટ્રા-ડે શેર 1.81 ટકા વધીને રૂ.1,558.80ને સ્પર્શ્યો હતો.

રિલાયન્સ ઇન્ડસ્ટ્રીઝનું માર્કેટ કેપ રૂ.6,672.09 કરોડ વધીને રૂ.5,04,458.09 કરોડ થયું છે. સોમવારે BSE પર કંપનીના 2.47 લાખ અને NSE પર 42 લાખ શેરનું ટ્રેડિંગ થયું હતું. ઉલ્લેખનીય છે કે, ચાલુ કેલેન્ડર વર્ષમાં રિલાયન્સનો શેર 43 ટકા ઊછળ્યો છે.

TCSએ સૌ પ્રથમ વખત 2014માં રૂ.5 લાખ કરોડનું માર્કેટ કેપ હાંસલ કર્યું હતું. આ સાથે રિલાયન્સ રૂ.5,04,458.09 કરોડના બજારમૂલ્ય સાથે સૌથી મૂલ્યવાન કંપની બની છે. TCS (રૂ.4,58,605.88 કરોડ) બીજા ક્રમે, ITC (રૂ.3,96,171.25 કરોડ) ત્રીજા ક્રમે અને HDFC (રૂ.2,63,114.16 કરોડ) ચોથા ક્રમે છે.