SBI તહેવારોમાં સસ્તી હોમ, ઓટો લોન આપશે

70764897 નવી દિલ્હી:SBIએ મંગળવારે તહેવારોની માંગનો લાભ લેવા હોમ અને ઓટો લોનના સસ્તા દર જાહેર કર્યા છે. ગ્રાહકોને સસ્તી લોન સાથે પ્રોસેસિંગ ફીમાંથી મુક્તિ, પ્રિ-એપ્રૂવ્ડ ડિજિટલ લોન સહિતની સુવિધા મળશે. જોકે, ફેસ્ટિવલ ઓફર માટેનો સમયગાળો દર્શાવ્યો નથી. અન્ય બેન્કો પણ SBIને અનુસરે તેવી શક્યતા છે.

SBIની યાદીમાં જણાવ્યા અનુસાર “બેન્કે ફેસ્ટિવલ સીઝનમાં કાર લોન પરની પ્રોસેસિંગ ફી રદ કરી છે. બેન્ક કાર લોનના ગ્રાહકોને 8.7 ટકાના દરથી નીચો વ્યાજદર ઓફર કરી રહી છે. તેને વ્યાજદરમાં વૃદ્ધિ નહીં થવાની સુવિધા પણ મળશે.” ‘નો એસ્કેલેશન’ એટલે ગ્રાહકને વ્યાજદરમાં વધઘટનો સામનો નહીં કરવો પડે.

SBIના ડિજિટલ પ્લેટફોર્મ YONO અથવા વેબસાઇટ દ્વારા કાર માટે ઓનલાઇન અરજી કરનારા ગ્રાહકને વ્યાજદરમાં 0.25ટકાનું કન્સેશન મળશે. પગારદાર ગ્રાહકો કારના ઓન-રોડ ભાવના 90 ટકા સુધીની લોન મેળવી શકશે.

SBIએ તાજેતરમાં માર્જિનલ કોસ્ટ ઓફ ફંડ્સ આધારિત લેન્ડિંગ રેટ (MCLR) 0.15 ટકા ઘટાડ્યા હતા. તેને લીધે હોમ લોનનો એકંદર વ્યાજદર એપ્રિલ 2019થી 0.35ટકા ઘટ્યો છે. બેન્ક અત્યારે 8.05ટકાના દરે સૌથી સસ્તી હોમ લોન આપે છે. પહેલી સપ્ટેમ્બરથી આ દર તમામ વર્તમાન અને નવી લોનને લાગુ પડશે.

SBIના જણાવ્યા અનુસાર ₹20 લાખની પર્સનલ લોન 10.75ટકાના વ્યાજદરથી મળશે અને તેની સૌથી લાંબી મુદત 6 વર્ષની હશે. વધુમાં સેલરી એકાઉન્ટ ધરાવતા ગ્રાહકોને YONO દ્વારા ₹5લાખ સુધીની પ્રિ-એપ્રૂવ્ડ ડિજિટલ લોન્સ મળી શકશે. એજ્યુકેશન લોન પણ 8.25ટકાના દરથી શરૂ થશે. ભારત અને વિદેશમાં અભ્યાસ માટે બેન્ક અનુક્રમે ₹50 લાખ અને ₹1.50 કરોડ સુધીની લોન આપશે. ગ્રાહકોને લોનની ચુકવણી માટે 15 વર્ષની મુદત મળશે, જે તેમના EMI બોજમાં ઘટાડો કરશે.