SBI Cardનો IPO ભરનારા હવે શેર ના લાગે તે માટે કરી રહ્યા છે ભગવાનને પ્રાર્થના!

અમદાવાદ: SBI Card IPOમાં ઉત્સાહભેર ભરણું ભરનારા હવે શેર ના લાગે તે માટે પ્રાર્થના કરી રહ્યા છે. આજે શેરબજારમાં બોલાયેલા અઠવાડિયાના બીજા સૌથી મોટા કડાકા બાદ IPOમાં રુપિયા રોકીને બેઠેલા હવે નથી ઈચ્છતા કે તેમને શેર લાગે. હાલ મંદીમાં બ્લૂચીપ કંપનીઓના શેર સસ્તામાં મળી રહ્યા છે, ત્યારે IPO ખૂલશે ત્યારે SBI Cardના શેર પ્રિમિયમમાં ખૂલશે કે નેગેટિવમાં તેની રાહ જોવા પણ કોઈ તૈયાર નથી.હજુ ગયા સપ્તાહ સુધી તો એક્સપર્ટ્સ એવી આગાહી કરી રહ્યા હતા કે SBI Cardમાં રુપિયા રોકનારા કમાઈ જવાના છે. બહુગાજલો આ IPO પણ 26 ગણો ભરાયો છે, અને કંપનીના અનલિસ્ટેડ શેર્સ 50 ટકા પ્રમિયિમ પર ટ્રેડ થઈ રહ્યા હતા. જોકે, કોરોના વાયરસને કારણે ગણતરીના દિવસોમાં જ આખું પિક્ચર બદલાઈ ગયું છે. થોડા દિવસ પહેલા SBI Cardના શેર લાગી જાય તેવી પ્રાર્થના કરનારા હવે શેર ના લાગે તો સારું તેવી પ્રાર્થના કરી રહ્યા છે.SBI Cardમાં મોટો દાવ ખેલનારા હવે ઈચ્છી રહ્યા છે કે તેમના બ્લોક થયેલા રુપિયા છૂટા થાય, અને તેનાથી તેઓ હાલ સસ્તામાં મળી રહેલા બ્લૂચિપ શેર્સને ખરીદી શકે. હાલ ગ્રે માર્કેટમાં પણ SBI Card પરનું પ્રિમિયમ ઘટીને માત્ર 15 રુપિયા પર આવી ગયું છે, જે એક સમયે 350 રુપિયા હતું.આખી દુનિયાના શેરબજાર હાલ ઉંધા માથે છે ત્યારે SBI Cardનો ઈશ્યૂ પ્રિમિયમમાં ખૂલે તેવી કોઈ શક્યતા નથી લાગી રહી. ભારતે વિદેશીઓના આવવા પર હંગામી પ્રતિબંધ મૂકી દીધો છે, અમેરિકામાં પણ યુરોપથી આવનારા લોકો પર નિયંત્રણ મૂકાયા છે ત્યારે વાયરસનો ફફડાટ હવે શેરબજારોને બરાબરના ભીંસમાં લઈ રહ્યો છે.હાલના દિવસોમાં થયેલા જોરદાર કરેક્શન બાદ માર્કેટમાં બ્લૂચિપ શેર્સ આકર્ષક દરે મળી રહ્યા હોવાનું એક્સપર્ટ્સનું માનવું છે. પાછલા વર્ષો પર નજર નાખીએ તો, આટલા મોટા કરેક્શન બાદ માર્કેટે જોરદાર રિટર્ન પણ આપ્યું છે. બીએસઈ પર લિસ્ટેડ 375 જેટલા શેર્સે 2008ની મંદી બાદ 300 ટકાથી લઈને 1.47 લાખ ટકા જેટલું રિટર્ન પાંચ વર્ષમાં આપ્યું હતું.