તહેવારોની સીઝન પહેલા SBIએ સસ્તી કરી Loans, સાથે બીજી પણ ઓફર્સ

મુંબઈ: તહેવારોની સીઝન શરુ થવાની તૈયારીમાં છે, તે પહેલા દેશની સૌથી મોટી બેંક એસબીઆઈ દ્વારા વિવિધ પ્રકારની લોન પર પ્રોસેસિંગ ફી પર ઓફર અપાઈ રહી છે. આ ઉપરાંત, બેંક દ્વારા કાર લોન અને પર્સનલ લોનના દર પણ ઘટાડવામાં આવ્યા છે. એસબીઆઈએ પોતાની એપ YONOને પ્રમોટ કરવા પણ ખાસ સ્કીમ્સ શરુ કરી છે.

SBI દ્વારા કરાયેલી જાહેરાત અનુસાર, તેણે કાર લોનનો દર ઘટાડીને 7.5 ટકા કર્યો છે. કેટલાક મોડેલ્સ પર બેંક 100 ટકા લોન પણ આપી રહી છે. જ્યારે પર્સનલ લોન 9.6 ટકા કર્યો છે. જે અરજકર્તા YONO દ્વારા લોન માટે અરજી કરશે તેને કાર, ગોલ્ડ લોન, પર્સનલ લોન, અને હોમ લોનના અપ્રુવ્ડ પ્રોજેક્ટ્સમાં ઝીરો પ્રોસેસિંગ ફી પર લોન મળશે.

અગાઉ SBI કાર લોન 7.75 ટકાના દરે, જ્યારે પર્સનલ લગભગ 10 ટકાથી ઉપરના રેટ પર આપતી હતી. પહેલીવાર તેણે આ લોન્સમાં આટલો મોટો ઘટાડો કર્યો છે. જ્યારે, હોમલોનમાં તેણે ઘટાડો કર્યા બાદ બીજી બેંકોએ પણ હોમ લોનના દર સસ્તા કરવાની ફરજ પડી હતી.

30 લાખ રુપિયાથી વધુની હોમ લોન માટે બેંક ક્રેડિટ સ્કોરના આધારે વ્યાજમાં 0.10 ટકા જેટલું કન્સેશન આપી રહી છે. આ ઉપરાંત, જો ગ્રાહક YONOમાંથી લોન માટે અપ્લાય કરે તો તેને 0.05 ટકા જેટલું વધારાનું વ્યાજમાં કન્સેશન અપાશે.

બેંક ગોલ્ડ લોન પર ફ્લેક્સિબલ રિપેમેન્ટ ફેસિલિટી પણ આપી રહી છે. હાલ બેંક 7.5 ટકાના દરે ગોલ્ડ લોન ઓફર કરે છે. જે લોકોની હાલ એસબીઆઈમાં લોન ચાલે છે, તેમને પણ YONO દ્વારા ટોપ-અપ લોન મળી શકે છે.

SBIના એમડી (રિટેલ અને ડિજિટલ બેન્કિંગ) સીએસ શેટ્ટીના જણાવ્યા અનુસાર, અર્થતંત્ર ધીરે-ધીરે પાટા પર ચઢી રહ્યું છે, અને લોકોના ખર્ચમાં પણ વધારો થાય તેવી આશા સાથે બેંકે ફેસ્ટિવલ સીઝન ટાણે આ ખાસ ઓફર્સ લોન્ચ કરી છે. તેમણે દાવો કર્યો હતો કે દેશમાં દર ત્રીજી ઓટો તેમજ હોમ લોન એસબીઆઈ દ્વારા આપવામાં આવે છે.