SBIએ ખાતાધારકોને વ્હોટ્સએપ પર આવતા મેસેજ અને ફોન અંગે આપી ચેતવણી

મુંબઈ: દેશની સૌથી મોટી બેંક SBIએ પોતાના ખાતાધારકોને વ્હોટ્સએપ પર આવતા કોલ્સ અને મેસેજ અંગે ચેતવણી આપી છે. બેંક દ્વારા જણાવાયું છે કે વ્હોટ્સએપ પર મેસેજ તેમજ ફોન કરીને કસ્ટમર્સને અકાઉન્ટની ડીટેઈલ્સ તેમજ પાસવર્ડ સહીતની વિગતો માગીને ઠગાઈ આચરવામાં આવી રહી હોવાનું ધ્યાને આવ્યું છે. તેવામાં ખાતાધારકો પોતાના અકાઉન્ટની કોઈપણ વિગતો આપીને ઠગાઈનો ભોગ ના બને તે માટે બેંક દ્વારા તાકીદ કરાઈ છે.

SBIએ પોતાના કસ્ટમર્સને ટ્વીટ દ્વારા જણાવ્યું છે કે ડિજિટલ પેમેન્ટના માધ્યમથી ઓનલાઈન ઠગાઈનું પ્રમાણ વધી રહ્યું છે. તેવામાં વ્હોટ્સએપ કોલ્સ અને મેસેજ દ્વારા હવે નવી રીતથી સાયબર ક્રાઈમ આચરવામાં આવી રહ્યા છે. થોડા દિવસ પહેલા જ બેંક દ્વારા ઠગો દ્વારા બેંક જેવા જ ઈમેલ આઈડીથી મોકલવામાં આવતા ફ્રોડ ઈમેલ અંગે પણ કસ્ટમર્સને ચેતવણી આપી હતી.


કઈ રીતે થાય છે ઠગાઈ?

વ્હોટ્સએપ પર બેંકના નામે મેસેજ કે ફોન આવે છે. જેમાં તેમને જણાવાય છે કે બેંક તરફથી તેમને લોટરી લાગી છે, અને આમ કહી તેમના અકાઉન્ટ કે કાર્ડની વિગતો માગવામાં આવે છે. બેંક દ્વારા જણાવાયું છે કે એસબીઆઈ દ્વારા ક્યારેય કોઈપણ ગ્રાહકો પાસેથી ઈમેલ, મેસેજ કે પછી વ્હોટ્સએપ મારફતે ક્યારેય અકાઉન્ટને લગતી વિગતો, પીન કે પાસવર્ડ માગવામાં નથી આવતા. આ ઉપરાંત, બેંક એવી કોઈ લોટરી સ્કીમ પણ નથી ચલાવતી કે જેમાં ગ્રાહકોને ઈનામ આપવામાં આવતું હોય.

ગ્રાહકની ભૂલથી ઠગાઈ થાય તો નહીં મળે રિફંડ

SBI દ્વારા એવી ચોખવટ પણ કરવામાં આવી છે કે જો બેંકની ભૂલથી કોઈ ઠગાઈ થાય તો કસ્ટમર્સને પૂરેપૂરી રકમ રિફંડ થઈ જશે. પરંતુ જો ગ્રાહકની બેદરકારીને કારણે તેની સાથે ઠગાઈ થાય તો તેવા કિસ્સામાં તેને કોઈ પ્રકારનું રિફંડ મળવા પાત્ર નથી. બેંકે ગ્રાહકોને એમ પણ કહ્યું છે કે ઓનલાઈન ઠગાઈ કરનારા લોકો બસ તમારી એક જ ભૂલની રાહ જોઈને બેઠા હોય છે.

ઓનલાઈન ઠગાઈનો વધતો ત્રાસ

લોકોને ફોન કરી તેમનું કાર્ડ એક્સપાયર થઈ રહ્યું છે, તે બંધ થઈ જશે કે પછી તેમને લોટરી લાગી છે, અને તેની રકમ થોડા ટાઈમમાં જમા થઈ જશે તેમ કહી તેમના ક્રેડિટ કે ડેબિટ કાર્ડની વિગતો લઈ લેવામાં આવતી હોય છે. જેવી આ વિગતો હાથમાં આવે કે સેકન્ડોમાં જ ગઠિયા ટાર્ગેટનું આખેઆખું અકાઉન્ટ સાફ કરી નાખતા હોય છે. આ રકમ ભૂતિયા બેંક અકાઉન્ટ્સમાં જમા થઈ જતી હોય છે. જેથી તેને ટ્રેક કરવી પણ ખૂબ જ મુશ્કેલ પડે છે. ઉલ્લેખનીય છે કે, ઝારખંડનો જામતારા જિલ્લો દેશભરમાં ઓનલાઈન ઠગાઈ માટે કુખ્યાત છે. વારંવાર લોકોને આ અંગે ચેતવણી આપવા છતાંય ગઠિયા ડિજિટલ વોલેટના કેવાયસીના નામે કે પછી બીજી કોઈ અવનવી રીતે ઠગાઈનો ખેલ ચાલુ રાખતા હોય છે.