SEBI સ્ટાર્ટ-અપ્સ માટે લિસ્ટિંગના નિયમો હળવા કરશે

67019564 નવી દિલ્હી:ભારતમાં સ્ટાર્ટ અપ્સનું લિસ્ટિંગ મોટા પાયે શરૂ કરવા માટે મૂડીબજારની નિયમનકાર સેબીએ નવા યુગના વેન્ચર્સ માટે કેટલાક નિયમો હળવા કરવાની યોજના બનાવી છે. તેમાં ઇ-કોમર્સ, ડેટા એનાલિટિક્સ અને બાયો ટેક્‌નોલોજી કંપનીઓને ફંડ એકત્ર કરવામાં તથા શેરબજારમાં તેમના શેર્સના ટ્રેડિંગમાં મદદ મળશે.

પ્રસ્તાવિત ફેરફારો વિશે ચાલુ સપ્તાહમાં સેબીની બોર્ડ મિટિંગમાં ચર્ચા થવાની શક્યતા છે. તેમાં ઇન્સ્ટિટ્યૂશનલ ટ્રેડિંગ પ્લેટફોર્મને ઇનોવેટર્સ ગ્રોથ પ્લેટફોર્મ નામ આપવામાં આવશે.

હાલના પ્લેટફોર્મમાં બજારે રસ દર્શાવ્યો ન હોવાના કારણે નિયમોમાં છૂટછાટ આપવામાં આવી રહી છે. વિવિધ શેરહોલ્ડર્સની પણ માંગણી હતી કે નિયમોને સરળ બનાવવામાં આવે અને પ્લેટફોર્મને વધુ એક્સેસિબલ કરવામાં આવે જેથી ભારતીય સ્ટાર્ટ-અપ્સ ક્ષેત્રે થતી કામગીરીનો ફાયદો મળે. સ્ટાર્ટ અપ્સમાં લિસ્ટિંગ માટે રસ વધી રહ્યો છે પરંતુ તેના કારણે વાસ્તવિક લિસ્ટિંગ થયું નથી. ઘણા સ્ટાર્ટ-અપ્સને અનુપાલનની કામગીરીમાં મુશ્કેલીનો સામનો કરવો પડે છે.

સ્ટાર્ટ અપ પ્લેટફોર્મની સમીક્ષા માટે સેબીએ ચાલુ વર્ષમાં જૂનમાં એક નિષ્ણાતના જૂથની રચના કરી હતી જેમાં ઇન્ડિયન સોફ્ટવેર પ્રોડક્ટ ઇન્ડસ્ટ્રી રાઉન્ડ ટેબલ, ઇન્ડસ આંત્રપ્રિન્યોર્સ, ઇન્ડિયન પ્રાઇવેટ ઇક્વિટી અને વેન્ચર કેપિટલ એસોસિયેશન, કાનૂની કંપનીઓ, મર્ચન્ટ બેન્કર્સ અને સ્ટોક એક્સ્ચેન્જિસનો સમાવેશ થાય છે.

ગ્રૂપે સ્ટાર્ટ-અપ્સ, રોકાણકારો, બેન્કર્સ, વેલ્થ મેનેજમેન્ટ કંપનીઓ સાથે વિસ્તૃત ચર્ચા કરી હતી અને તેનો રિપોર્ટ સેબીને સોંપવામાં આવ્યો હતો. ત્યાર પછી આ અંગે પબ્લિક કન્સલ્ટેશન પેપર રજૂ કરવામાં આવ્યા હતા.