શેરબજારમાં આજે 636 પોઈન્ટ્સનો જોરદાર ઉછાળો, સેન્સેક્સ 37,327 પર બંધ

મુંબઈ: છેલ્લા કેટલાક દિવસોથી સતત થઈ રહેલા ઘટાડા બાદ આજે સેન્સેક્સમાં 636 પોઈન્ટ્સનો જોરદાર ઉછાળો જોવા મળ્યો છે. આજે 36,714ના સ્તરે ખૂલેલો સેન્સેક્સ સામાન્ય ઉછાળા બાદ 11.30 કલાકે પાછો ઘટ્યો હતો. જોકે, ત્યારબાદ તેણે સતત વધારો દર્શાવ્યો હતો, અને બપોરે 2.40 કલાક બાદ તેમાં એકધારો ઉછાળો જોવાયો હતો. નિફ્ટીમાં પણ આજે 176 પોઈન્ટ્સનો વધારો જોવાયો છે, આજે નિફ્ટી 11,032ની સપાટીએ બંધ થયો હતો. હવે સીધા Whatsapp પર મેળવો મહત્વના ન્યૂઝ, શરુ કરવા ક્લિક કરો છેલ્લા કેટલાક દિવસોથી સતત ધોવાઈ રહેલા રિલાયન્સના શેરમાં આજે જોરદાર તેજી જોવા મળી હતી. રિલાયન્સ ઈન્ડસ્ટ્રીઝનો શેર આજે સવારે એક સમયે 1097 રુપિયાના સ્તર પર પહોંચી ગયો હતો. જોકે, ત્યારબાદ જોરદાર રિકરવી બતાવતા આ શેર રુ. 1156ના સ્તરે બંધ આવ્યો હતો. આમ, આજે આ શેરમાં એક જ દિવસમાં 58 રુપિયા જેટલી તેજી જોવા મળી છે. આજે બીએસઈમાં વધનારા શેર્સમાં ટાટા મોટર્સ, એચસીએલ ટેક્નોલોજી, બજાજ ઓટો, રિલાયન્સ, મહિન્દ્રા એન્ડ મહિન્દ્રા, હીરોમોટો કોર્પ, યસ બેંક અને બજાજ ફાઈનાન્સ મુખ્ય રહ્યા હતા. જ્યારે ઘટનારા શેર્સમાં ટાટા સ્ટીલ ટોચ પર રહ્યો હતો. ગઈકાલે આવેલા નબળા પરિણામ બાદ આજે ટાટા સ્ટીલનો શેર રુ. 14.50 ના ઘટાડા સાથે 367.40ના સ્તરે બંધ થયો હતો. હાલ આ શેર પોતાની 52 વીકની નીચલી સપાટીએ ટ્રેડ કરી રહ્યો છે. એનએસઈમાં ઘટનારા શેર્સની વાત કરીએ તો, ટાટા સ્ટીલ ઉપરાંત, અલ્ટ્રાટ્રેક સિમેન્ટ, સિપ્લા, ઈન્ડિયાબુલ્સ હાઉસિંગ, ઈન્ડસિન્ડ બેંક, ગ્રાસિમ જેવા શેર્સ આજે લુઝર્સ રહ્યા હતા. મહત્વનું છે કે, ગઈકાલે રિઝર્વ બેંકે રેપો રેટમાં 35 બેસિસ પોઈન્ટ્સનો ઘટાડો કર્યા બાદ પણ શેરબજારને તેની કશીય અસર નહોતી થઈ, અને સેન્સેક્સ ઘટાડા સાથે બંધ થયો હતો. આજે પણ શરુઆતના બે કલાકમાં બજારમાં સુસ્તી જોવા મળી હતી, પરંતુ ત્યારબાદ ખરીદી નીકળતા સેન્સેક્સ અને નિફ્ટી વધારા સાથે બંધ થયા હતા.