સેન્સેક્સ, નિફ્ટી નવી ટોચે, RIL, ITCમાં ઉછાળો

મુંબઈ: સોમવારે બપોરે RIL, FMCG કંપની ITCની આગેવાનીમાં ભારે લેવાલીથી સેન્સેક્સ અને નિફ્ટી ઈન્ડાઈસિસ તેની નવી ટોચે ટ્રેડ થઈ રહ્યા હતા. આજે બેન્ક શેરોમાં પણ આક્રમક લેવાલી જોવા મળી હતી.

આજે BSE સેન્સેક્સ 32,100.22ની સપાટીએ ખૂલ્યા બાદ તે ઉપરમાં 32,232.63 પોઈન્ટ અને નીચામાં 32,058.33 પોઈન્ટની સપાટીને સ્પર્શ્યો હતો. આજે બપોરે 11 વાગ્યે સેન્સેક્સ 194.29 પોઈન્ટ અથવા 0.61 ટકા વધીને 32,223.18 પોઈન્ટની સપાટીએ ટ્રેડ થઈ રહ્યો હતો.

નિફ્ટી ઈન્ડેક્સ પણ 52.08 પોઈન્ટના ઉછાળા સાથે 9,950ની મનોવૈજ્ઞાનિક સપાટી વટાવીને 9,968.05ની સપાટીએ ટ્રેડ થઈ રહ્યો હતો. અપેક્ષાથી સારા કંપની પરિણામોને પગલે એનર્જી, બેન્કિંગ, IT, કન્ઝ્યુમર ડ્યુરેબલ્સ વગેરે સેક્ટરના હેવીવેઈટ શેરોમાં ભારે લેવાલી જોવા મળી હતી.

આજે બપોરે રિલાયન્સ 2.21 ટકા, વિપ્રો 1.96 ટકા, ITC 1.80 ટકા, ICICI બેન્ક 1.48 ટકા અને NTPCના શેર્સ 1.19 ટકા વધીને ટ્રેડ થઈ રહ્યા હતા.

પ્રોવિઝનલ ડેટા અનુસાર ફોરેન પોર્ટફોલિયો ઈન્વેસ્ટર્સે (FPIs)ગત શુક્રવારે 12.90 કરોડના શેરોની ચોખ્ખી ખરીદી કરી હતી જ્યારે સ્થાનિક સંસ્થાગત રોકાણકારોએ(DIIs)147.66 કરોડના શેર્સ ખરીદ્યા હતા.

એશિયાન બજારોમાં આજે મિશ્ર વલણ જોવા મળ્યું હતું. નિક્કી ફ્લેશ જાપાન મેન્યુફેક્ચરિંગ પરચેઝિંગ મેનેજર ઈન્ડેક્સ જુલાઈમાં 52.2ની આઠ મહિનાની નીચી સપાટીએ આવી ગયો હતો. જૂનમાં PMI 52.4 હતો.