સેન્સેક્સમાં 1114 પોઈન્ટ્સનું જંગી ગાબડું, નિફ્ટી 11 હજારની નીચે સરક્યો

મુંબઈ: વૈશ્વિક બજારોને પગલે આજે ભારતીય શેરબજારમાં પણ જોરદાર કડાકો જોવા મળ્યો છે. આજે સેન્સેક્સમાં 1114 પોઈન્ટ્સ, જ્યારે નિફ્ટીમાં 307 પોઈન્ટ્નો ઘટાડો જોવા મળ્યો હતો. નિફ્ટી 50માં આજે ઈન્ડસિન્ડ બેંક સૌથી વધુ 7.45 ટકાના ઘટાડા સાથે 488 રુપિયાની સપાટીએ બંધ રહ્યો હતો. આજે બેંક શેર્સની સાથે આઈટી શેર્સમાં પણ સારો એવો કડાકો બોલાયો હતો.

આજે ઘટનારા મુખ્ય શેર્સમાં બજાજ ફાઈનાન્સ, ટેકમહિન્દ્રા, ટીસીએસ, M&M મુખ્ય રહ્યા હતા. આ તમામ શેર્સ આજે 5 ટકાથી પણ વધુ તૂટ્યા હતા. આ સિવાય ટાટા સ્ટીલ, બજાજ ફિનસર્વ, ઈન્ફોસિસમાં પણ ચાર ટકાથી વધુ ઘટાડો જોવા મળ્યો હતો. માત્ર એચયુએલને બાદ કરતા આજે સેન્સેક્સના તમામ શેર્સ રેડ ઝોનમાં બંધ થયા હતા.

આ સપ્તાહની શરુઆતમાં સેન્સેક્સ 39,000ની સપાટીએ હતો, જે ઘટીને આજે 36,553ના સ્તરે બંધ થયો હતો. જ્યારે નિફ્ટી પણ આજે 11 હજારની સપાટીની નીચે સરકીને 10,805 પર બંધ આવ્યો હતો. છેલ્લા કેટલાક દિવસોથી સારા એવા વધેલા આઈટી શેર્સમાં પણ આજે જોરદાર વેચવાલી જોવા મળી હતી. જેના પગલે ટીસીએસ 134 રુપિયા ઘટીને 2332, ટેક મહિન્દ્રા 40 રુપિયાના ઘટાડા સાથે 752, ઈન્ફોસિસ 44 રુપિયાના ઘટાડા સાથે 975ના સ્તરે બંધ આવ્યા હતા.