શેરબજારમાં છેલ્લા અડધા કલાકમાં અફરાતફરી, સેન્સેક્સ 810 પોઈન્ટ્સના ઘટાડા સાથે બંધ

મુંબઈ: કોરોના વાયરસના ડરને કારણે શેરબજારમાં ધોવાણ અટકવાનું નામ નથી લઈ રહ્યું. ગઈકાલે 2700 પોઈન્ટ્સના કડાકા બાદ સેન્સેક્સ આજે પણ 810 પોઈન્ટ્સ ઘટ્યો છે. બજાર ખૂલ્યું ત્યારે મહદઅંશે સ્થિર હતું, અને એક તબક્કે તેમાં થોડો સુધારો પણ જોવા મળ્યો હતો. જોકે, છેલ્લા અડધો કલાકમાં આખો સીન બદલાઈ ગયો હતો અને જોરદાર વેચવાલી નીકળતા ફરી બજાર ઘટ્યું હતું.બેંક શેરોમાં ભારે ધોવાણની વચ્ચે આજે યસ બેંક 58 ટકાના વધારા સાથે 58 રુપિયાના સ્તરે બંધ થયો હતો. આ શેરે 10 જ દિવસમાં 5.65 રુપિયાના તળીયેથી 1000 ટકા રિકવરી બતાવી છે.આજે સેન્સેક્સ પાછલા બંધની સરખામણીએ 200 પોઈન્ટ્સ જેટલા વધારા સાથે 31,611ની સપાટી પર ખૂલ્યો હતો. પ્રારંભિક કલાકોમાં થોડા ઘટાડા બાદ સેન્સેક્સે સારો સુધારો બતાવ્યો હતો, અને એક સમયે તે 32,047ના સ્તર પર પહોંચ્યો હતો. જોકે, છેલ્લી મિનિટોમાં વેચવાલીનું જોર વધતા સેન્સેક્સ 30,394નો લો બનાવી 30,579 પોઈન્ટ્સ પર બંધ થયો હતો.BSE સેન્સેકક્સના આજે સૌથી વધુ ઘટનારા શેર્સમાં બેંક શેર્સ ટોચ પર રહ્યા હતા. ઈન્ડસિન્ડ બેંકનો શેર 9 ટકા ઘટીને 60 રુપિયાના ઘટાડા સાથે 604 રુપિયાના સ્તરે બંધ થયો હતો. ICICIનો શેર પણ આજે 8.85 ટકા ઘટી 35 રુપિયાના ઘટાડા સાથે 367 રુપિયાના સ્તરે બંધ આવ્યો છે. બજાજ ફાઈનાન્સ, અને કોટક બેંક પણ આજે ક્રમશ: 6.19 ટકા અને 4.41 ટકા તૂટ્યા છે. એક્સિસ બેંકમાં પણ આજે 3.98 ટકાનો જ્યારે HDFCમાં 4.67 ટકાનો ઘટાડો જોવા મળ્યો હતો.ઈન્ફોસિસે પણ આજે 52 સપ્તાહની સૌથી નીચી સપાટી તોડી 550 રુપિયાનું નવું તળીયું બનાવ્યું હતું, અને ભારે ચઢઉતર બાદ આ શેર 555.60 રુપિયાના સ્તરે બંધ રહ્યો હતો.વધનારા શેર્સની વાત કરીએ તો, BSE પર HUL આજે ટોચ રહ્યો હતો. ત્યારબાદ હીરોમોટોકોર્પ, પાવરગ્રીડ, મારુતિ, એશિયન પેઈન્ટ્સ, નેસ્લે, આઈટીસી, એચસીએલ અને સનફાર્મામાં પણ સાધારણ તેજી જોવા મળી હતી.નિફ્ટી પર આજે સૌથી વધનારા શેર્સમાં યસ બેંક, આઈશર મોટર્સ ટોચ રપર રહ્યા હતા. આ સિવાય અદાણી પોર્ટ્સ, સિપ્લા, વેદાંતામાં પણ સામાન્ય સુધારો જોવા મળ્યો હતો. જ્યારે ઘટનારા શેર્સમાં ઝી 19.99 ટકાના ઘટાડા સાથે ટોચ પર રહ્યો હતો. ત્યારબાદ ઈન્ડસિન્ડ બેંક, ઈન્ફ્રાટેલ, યુપીએલ, બજાજફિનવર્સરી, ટાટા મોટર્સ, ગ્રાસિમ પણ સારા એવા ઘટ્યા હતા.