સેન્સેક્સ 494 પોઈન્ટ્સની છલાંગ લગાવી 46,164ની ઓલટાઈમ હાઈ સપાટીને સ્પર્શ્યો

મુંબઈ: કોરોનાની રસી નજીકના જ ભવિષ્યમાં ઉપલબ્ધ બનશે તેવી આશાએ દિવસેને દિવસે ઉછળી રહેલા શેરબજારે આજે નવો રેકોર્ડ બનાવ્યો છે. આજે સેન્સેક્સમાં ઈન્ટ્રા ડે 500 પોઈન્ટ્સથી પણ વધુનો ઉછાળો જોવા મળ્યો હતો, અને તે 46164ની ઐતિહાસિક સપાટીને સ્પર્શી ગયો હતો. જોકે, ત્યારબાદ તે સામાન્ય ઘટાડા સાથે 46,103ની સપાટીએ બંધ થયો હતો.

બીએસઈ સેન્સેક્સની જ વાત કરીએ તો, આજે સૌથી વધુ ઉછળનારા શેર્સમાં એશિયન પેઈન્ટ્સ, કોટક બેંક, એચડીએફસી બેંક, ઈન્ફોસિસ, એક્સિસ બેંક, રિલાયન્સ અને આઈટીસી ટોચ પર રહ્યા હતા. આઈટીસીના શેરે આજે 200 રુપિયાની સપાટી વટાવી હતી અને તે 205 રુપિયાના સ્તરે બંધ આવ્યો હતો. આ ઉપરાંત, એચયુએલ, ઈન્ડસિન્ડ બેંક, બજાજ ફાઈનાન્સ, એલએન્ડટી, એચસીએલ અને ટીસીએસ પણ વધ્યા હતા.

નિફ્ટી પણ આજે 136 પોઈન્ટના ઉછાળા સાથે 13,529ના સ્તરે બંધ થયો હતો. બેંક, આઈટી અને એફએમસીજી શેર્સમાં આજે લેવાલી જોવા મળી હતી તો બીજી તરફ મેટલ અને ઓટો શેર્સમાં આજે નબળાઈ દેખાઈ હતી. આજે ઘટનારા નિફ્ટી શેર્સમાં હિન્દાલ્કો, શ્રીસિમેન્ટ, અલ્ટ્રાટેક, મારુતિ, ટાટા સ્ટીલ, બજાજ ઓટો ટોચ પર રહ્યા હતા.