સોફ્ટબેન્ક બ્રિટનની ARMને રૂ. ૨.૧૫ લાખ કરોડમાં ખરીદશે

જાપાનની મોબાઈલ ટેક્નોલોજી કંપની સોફ્ટબેન્કે આઈફોનની ચિપ ડિઝાઈન કરતી કંપની એઆરએમ હોલ્ડિંગ્સને આશરે ૩૨ અબજ ડોલર (આશરે રૂ.૨.૧૫ લાખ કરોડ)ના રોકડ સોદામાં ખરીદવા સહમતિ દાખવી છે. યુરોપિયન સંઘમાંથી અલગ થવાના નિર્ણય બાદ બ્રિટનમાં કોઈ કંપની દ્વારા કરાયેલી રોકાણની આ સૌથી મોટી જાહેરાત છે. આ સોદા અંગે સોફ્ટબેન્કના ચેરમેન અને સીઈઓ માસાયોશી સને જણાવ્યું હતું કે એઆરએમ એ વિશ્વની સૌથી જાણીતી અને અત્યંત ઉચ્ચ પ્રતિષ્ઠા ધરાવતી કંપની છે જે તેના ક્ષેત્રમાં ટોચનું સ્થાન ધરાવે છે. આ સોદો યુનાઈટેડ કિંગડમમાં કારોબારને વેગ આપવાની કંપનીની પ્રતિબદ્ધતા દર્શાવે છે. સોફ્ટબેન્કે જણાવ્યું હતું કે તે એઆરએમના શેર દીઠ ૧૭ પાઉન્ડ ચૂકવશે, જે તેના શુક્રવારના ૧૧.૮૯ પાઉન્ડ્સના બંધ ભાવના ૪૩ ટકા પ્રીમિયમે છે.

યુનિવર્સિટીઓના શહેર તરીકે જાણીતાં કેમ્બ્રિજમાં મુખ્ય મથક ધરાવતી એઆરએમને વિજ્ઞાન અને ટેક્નોલોજી ક્ષેત્રે અહીંના પ્રતિભાશાળી લોકોનો લાભ મળી રહે છે. બ્રિટનના નવા નાણાં મંત્રી ફિલિપ હેમન્ડે દેશમાં મંદીની આગાહીઓ વચ્ચે થયેલા આ મેગા ડિલને આવકારી હતી. એક નિવેદનમાં તેમણે જણાવ્યું હતું કે ૩૨ અબજ ડોલરનું આ રોકાણ એશિયામાંથી યુકેમાં અત્યાર સુધીમાં કરાયેલું સૌથી મોટું રોકાણ છે. આગામી પાંચ વર્ષમાં આ સોદાને પગલે એઆરએમમાં રોજગારીની સંખ્યા વધીને બમણી થઈ જશે જે આ બ્રિટિશ કંપનીને વૈશ્વિક સ્તરે લઈ જશે.

બ્રેક્ઝિટના નિર્ણયના માત્ર ત્રણ જ સપ્તાહની અંદર હાથ ધરાયેલો આ સોદો દર્શાવે છે કે બ્રિટન પ્રત્યેના આંતરરાષ્ટ્રીય રોકાણકારોના આકર્ષણમાં લેશ માત્ર ઘટાડો થયો નથી. વિશ્લેષકોના મતે બ્રેક્ઝિટ બાદ છેલ્લાં કેટલાંક સમયથી નબળા પડેલા પાઉન્ડને લીધે વિદેશી રોકાણકારો માટે બ્રિટિશ કંપનીઓ આકર્ષક બની છે. ઈટીએક્સ કેપિટલ ટ્રેડિંગ ગ્રૂપના વિશ્લેષક નીલ વિલ્સનના જણાવ્યાં અનુસાર આ સોદામાં બ્રેક્ઝિટ અને નબળાં પાઉન્ડની અસર જોઈ શકાય છે. જેને લીધે બ્રિટિશ કંપનીઓ ટેકઓવર માટે આકર્ષક લક્ષ્યાંક બની છે. આગામી સમયમાં વધુને વધુ બ્રિટિશ કંપનીઓ વિદેશી માલિકીની થઈ જશે. ગયા સપ્તાહે દક્ષિણ આફ્રિકાના જનરલ રિટેલ ગ્રૂપ સ્ટેઈનહોફ ઈન્ટરનેશનલે બ્રિટિશ ડિસ્કાઉન્ટર પાઉન્ડલેન્ડને ૫૯.૭ કરોડ પાઉન્ડમાં હસ્તગત કરવા સહમતિ દાખવી હતી.