કોરોના: સન ફાર્માએ લોન્ચ કરી સસ્તી દવા, જાણો તેની કિંમત

સમગ્ર દેશમાં કોરોના વાયરસના કેસમાં સતત વધારો થઈ રહ્યો છે. તેવામાં કોરોના વાયરસના દર્દીઓ માટે રાહતના સમાચાર છે. સન (Sun) ફાર્માસ્યુટિકલ ઈન્ડસ્ટ્રીઝ લિમિટેડે આજે એ પ્રકારે જાહેરાત કરી છે કે તેમણે ભારતમાં ફ્લુગાર્ડ (FluGuard) 35 રૂપિયા પ્રતિ ગોળીના ભાવે લોન્ચ કરી છે. અહીં નોંધનીય છે કે ફ્લુગાર્ડ (FluGuard) નામની આ ગોળી એ ફેવિપિરાવિર (Favipiravir 200 mg) છે. આ ગોળી કોરોના વાયરસના હળવાથી મધ્યમસ્તરના કેસોમાં ઉપચાર માટે છે. ફ્લુગાર્ડ® આ અઠવાડિયાથી બજારમાં ઉપલબ્ધ છે.

આ દવાના લોન્ચ વિશે વાત કરતા સન ફાર્માના ઈન્ડિયન બિઝનેસના મુખ્ય કાર્યકારી અધિકારી, કીર્તિ ગાનોરકરે જણાવ્યું કે ભારતમાં દરરોજ કોરોના વાયરસના હજારો કેસ નોંધાઈ રહ્યા છે. તેવામાં ઉપચાર માટેના વધુ વિકલ્પ ઉપલબ્ધ કરાવવા ખૂબ જરૂરી છે. અમે ફ્લુગાર્ડ®ને સામાન્ય દરે લોન્ચ કરી રહ્યા છીએ કે જેથી તે વધુ દર્દીઓને ઉપલબ્ધ કરાવી શકાય અને આર્થિક બોજ પણ હળવો થાય. ભારતમાં કોરોના વાયરસની મહામારીના પ્રકોપને રોકવાનો હેતુ અમારા દ્વારા હંમેશાંથી કરવામાં આવતા પ્રયાસોને અનુરૂપ છે.

તેમણે કહ્યું કે કંપની, સરકાર અને મેડિકલ વ્યવસાય સાથે મળીને કાર્ય કરશે કે જેથી સમગ્ર દેશમાં ફ્લુગાર્ડ®ની ઉપલબ્ધતા નિશ્ચિત થઈ શકે. ફ્લુગાર્ડ® આ અઠવાડિયાથી બજારમાં ઉપલબ્ધ થશે. ફ્લુગાર્ડ® સનફાર્માનો રજિસ્ટર્ડ ટ્રેડમાર્ક છે.