Apple ફોનના પાર્ટ્સ ભારતમાં બનાવશે ટાટા ગ્રુપ? રૂ.5000 કરોડના ખર્ચે બની રહી છે ફેક્ટરી

દુનિયાની સૌથી મોટી સ્માર્ટફોન બનાવનારી કંપની એપલના પાર્ટ્સ હવે જલ્દી જ ભારતમાં બનશે. ટાટા ગ્રુપ આ કામ માટે તમિલનાડુમાં રૂપિયા 5000 કરોડના ખર્ચે એક સ્માર્ટફોન પાર્ટ્સ મેન્યુફેક્ચરિંગ યુનિટ બનાવી રહી છે. આ માટે ટાટા ગ્રુપના નવા બનેલા ટાટા ઈલેક્ટ્રોનિક્સને જમીન મળી ગઈ છે. તમિલનાડુના TIDCOમાં 500 એકર જમીન પણ મળી ગઈ છે. આ ફેક્ટરીમાં આઈફોન ઉપરાંત એપલ આઈપેડ, સ્માર્ટવોચ અને મેકબુકના પાર્ટ્સ પણ બનાવવામાં આવશે.

રિપોર્ટ મુજબ, 27મી ઓક્ટોબરે જ્યાં ફેક્ટરી બનવાની છે તે સ્થળે ભૂમિ પૂજન પણ કરાયું હતું. જોકે એપલ તરફથી આ મામલે હજુ સુધી કોઈ ઓફિશિયલ નિવેદન આપવામાં આવ્યું નથી. જ્યારે ટાટાના પ્રવક્તાએ જણાવ્યું કે, આ ફેક્ટરી ખાસ રીતે કોઈ બ્રાન્ડના ફોનના પાર્ટ્સ નહીં બનાવે, પરંતુ આ ઘણી કંપનીઓના ઓર્ડર મળવા પર ફોન પાર્ટ્સનું ઉત્પાદન કરશે.

ટાટા અને TIDCO તરફથી ઓફિશિયલ સ્ટેટમેન્ટ આપવામાં આવ્યુ નથી. પરંતુ રિપોર્ટ્સ મેન્યુફેક્ચરિંગ પ્લાન્ટમાં મોટા પ્લાન તરફ ઈશારો કરે છે. રિપોર્ટ મુજબ, ટાટાના આ મેન્યુફેક્ચરિંગ પ્લાન્ટમાં આગામી વર્ષના ઓક્ટોબર સુધીમાં 18,000 કર્મચારીઓ હશે. જેમાંથી 90 ટકા સ્ટાફ મહિલાઓ હશે.

ઉલ્લેખનીય છે કે એપલ માટે ફોનના પાર્ટ્સ બનાવતી ફોક્સકોન કંપની પહેલાથી જ ભારતમાં પોતાનો નવા પ્લાન્ટ લાવી ચૂકી છે. એવામાં હવે ટાટા પણ આઈફોનના પાર્ટ્સ બનાવવા તરફ વધારે ભાર આપી રહ્યું છે. એકવાર પ્લાન્ટનું કામ શરૂ થઈ જાય પછી તેને વધારે મોટો કરીને રોકાણ કરવાનો પ્લાન છે. રિપોર્ટ મુજબ, ટાટા આ પ્લાન્ટમાં રૂપિયા 8000 કરોડ સુધીનું રોકાણ કરીને વિસ્તરણ કરી શકે છે.

રિપોર્ટ મુજબ, પ્રોડક્શન ફેસિલિટીની દેખરેખ ટાટા ગ્રુપની 'ટાઈટન એન્જિનિયરિંગ એન્ડ ઓટોમેશન (TEAL)' હેઠળ રહેશે. હાલમાં ભારતમાં એપલ માટે ફોક્સકોન, વિસ્ટ્રોન અને પેગાટ્રોન કંપનીઓ પાર્ટ્સ બનાવી રહી છે.