દેશની સૌથી મોટી આઇટી કંપની ટીસીએસે માર્કેટ એનાલિસ્ટોને ખોટા પાડીને તેમની ધારણાં કરતાં વધુ સારી કામગીરી નોંધાવી હતી. કંપનીનો ૩૦ જુન ૨૦૧૬ને અંતે પૂરા થયેલા ત્રિમાસિક ગાળામાં વાર્ષિક ધોરણે નફો ૯.૯ ટકા વધીને રૂ.૬,૩૧૭ કરોડનો થયો હતો જે આગલા વર્ષના સમાન ગાળામાં રૂ.૫,૭૪૭ કરોડનો હતો. કંપનીના પરિણામ બજાર બંધ થયા પછી જાહેર થયા હતા પરંતુ જાણે માર્કેટમાં પહેલેથી પરિણામ અંગે સંકેતો મળી ગયા હોય તેમ શેરનો ભાવ ૧.૨ ટકા વધીને ૨,૫૨૦.૩૦ની સપાટીએ બંધ રહ્યો હતો. કંપનીની આ ગાળામાં કોન્સોલિડેટેડ રેવેન્યૂ ૧૪.૨ ટકા વધીને રૂ. ૨૯,૩૦૫ કરોડની થઈ હતી જે આગલા વર્ષના સમાન ગાળામાં રૂ. ૨૫,૬૬૮ કરોડની હતી. આ ગાળામાં એનાલિસ્ટોએ નફો રૂ. ૬,૦૫૦ કરોડનો અંદાજ્યો હતો. કામગીરીને પગલે એનાલિસ્ટોએ શેરનો ભાવ વર્ષમાં રૂ. ૩,૦૦૦નો અંદાજ્યો છે. કંપનીના સીઇઓ અને મેનેજીંગ ડિરેકટર એન. ચંદ્રશેખરનના જણાવ્યા પ્રમાણે, મજબૂત અમલીકરણ, ક્લાઉડ અંગે ગ્રાહકોની સ્વીકૃતતા, ડેટા બિઝનેસ અને એલેટિક્સને કારણે કામગીરીમાં સુધારો થયો હતો. અમારું પ્લેટફોર્મ ડેવલોપમેન્ટને સફળતા મળી છે અને તેને કારણે સમયે સમયે સ્પર્ધાત્મકતા વચ્ચે પણ બ્રોડબેઇઝ ગ્રોથ હાંસલ કરી શક્યા છીયે. ટીસીએસે ડિજિટલ ટેકનોલોજીમાં ૧.૬૫ લાખ કર્મચારીઓને ટ્રેઇન કર્યા હતા અને આ સેગ્મેન્ટનો કુલ આવકમાં હિસ્સો ૧૫.૯ ટકાનો રહ્યો હતો. આ ગાળામાં ગ્રોસ કર્મચારીઓની સંખ્યામાં ૧૭,૭૯૨ની વૃધ્ધિ થઈ હતી અને આ ગાળાને અંતે કુલ સંખ્યા ૩.૬૨ લાખની થઈ હતી. કંપનીએ આ ગાળા માટે શેરદીઠ રૂ.૬.૫૦ની ડિવિડંડની ભલામણ કરી હતી. કંપનીનો ત્રિમાસિક ધોરણે નફો સાધારણ ઘટ્યો હતો જ્યારે રેવેન્યૂમાં ૩ ટકાની વૃધ્ધિ થઈ હતી. કંપનીનું ઓપરેટિંગ માર્જીન ૨૫.૧ ટકાના સ્તરે રહ્યું હતું. ઓપરેટિંગ આવક વાર્ષિક ધોરણે ૮.૯ ટકા વધીને રૂ.૭,૩૪૭ કરોડની થઈ હતી. કંપનીની અન્ય આવક ૬.૫ ટકા વધીને રૂ. ૯૭૫ કરોડની થઈ હતી. આ ગાળામાં ૨ કરોડ ડોલરની કેટેગરીમાં છ વધુ નવા ગ્રાહકોનો યાદીમાં ઉમેરો થયો હતો જ્યારે સતત ત્રીજા ત્રિમાસિક ગાળામાં એટ્રિએશન રેશિયો ઘટીને ૧૩.૬ ટકા રહ્યો હતો જે આગલા વર્ષના સમાન ગાળામાં ૧૫.૫ ટકા હતો. કંપનીએ મજબૂત ડિજીટલ ટેલેન્ટનો પાયો ઊભો કર્યો હોવાનું આ સૂચવે છે એમ ચંદ્રશેખરને જણાવ્યું હતું.
TCSનો નફો 10% વધી રૂ.6,317 કરોડ
I am Gujarat 15 Jul 2016, 4:30 am