ઈન્ફી કરતાં TCS ઘણો આગળ રહેશે

71719693 સનમ મીરચંદાણી

I am Gujarat

મુંબઈ:ઇન્ફોસિસના એક્ઝિક્યુટિવ્સ સામે વ્હીસલ બ્લોઅરે ‘અનૈતિક કામગીરી’ની ફરિયાદ કર્યા બાદ ટીસીએસ અને ઇન્ફોસિસ વચ્ચેનો તફાવત વધુ પહોળો થાય તેવી શક્યતા છે. ઇન્ફોસિસની તુલનામાં ટીસીએસના શેરને અત્યારે વધારે સુરક્ષિત ગણવામાં આવે છે. મંગળવારે ઇન્ફોસિસમાં છ વર્ષનો સૌથી મોટો ઘટાડો થયો હતો અને શેર એક મહિનાના તળિયે બંધ રહ્યો હતો.

યુબીએસના દિવ્યા નાગરાજને એક નોટમાં જણાવ્યું કે, “નજીકના ગાળામાં ઇન્ફોસિસના શેરમાં નેગેટિવ રિએક્શન શક્ય છે. આ મુદ્દે ચિત્ર સ્પષ્ટ ન થાય ત્યાં સુધી ટીસીએસની સરખામણીમાં ઇન્ફોસિસનું વેલ્યુએશન ડિસ્કાઉન્ટ વધવાની શક્યતા છે.” તેમણે ઇન્ફોસિસના શેર માટે ‘ન્યુટ્રલ’ રેટિંગ જાળવ્યું છે.

મંગળવારે ઇન્ફોસિસનો શેર 16.2 ટકા ઘટીને ₹643.30 બંધ રહ્યો હતો. તેના કારણે બીએસઇ આઇટી ઇન્ડેક્સ સાત ટકા ઘટ્યો હતો. ટીસીએસનો શેર 0.3 ટકા ઘટીને ₹2051.65 બંધ આવ્યો હતો.

છેલ્લા કેટલાક મહિનાથી ઇન્ફોસિસ અને ટીસીએસ વચ્ચેનો તફાવત ઘટી રહ્યો હતો કારણ કે નવા મેનેજમેન્ટની નિમણૂક પછી બેંગલુરુ સ્થિત કંપનીની સંભાવનાઓ સુધરી હતી.

30 સપ્ટેમ્બરના રોજ ઇન્ફોસિસનો ટ્રેલિંગ પ્રાઇસ ટુ અર્નિંગ (પીઇ) રેશિયો 22 ગણો હતો જ્યારે ટીસીએસનો પીઇ રેશિયો 24.4 ગણો હતો. હવે તે વધ્યો છે અને ઇન્ફોસિસનો પીઇ 17.7 છે જ્યારે ટીસીએસ 23.8ના પીઇ રેશિયો પર ટ્રેડ થાય છે. પીઇ રેશિયો વધતો જાય તે દર્શાવે છે કે રોકાણકારોને ઇન્ફોસિસમાં નાણાં રોકવા કરતા ટીસીએસમાં રોકાણ કરવામાં વધુ ભરોસો છે.

રિલાયન્સ સિક્યોરિટીઝના આઇટી એનાલિસ્ટ હરિત શાહે જણાવ્યું કે, “ટીસીએસને નજીકના ગાળામાં વધુ પસંદ કરવામાં આવશે કારણ કે તે મુખ્ય શેર છે. અત્યાર સુધીમાં કંઈ સાબિત થયું નથી પરંતુ ઇન્ફોસિસ સામેના આરોપો ઘણા ગંભીર છે. આ મુદ્દો ઉકેલાય નહીં ત્યાં સુધી શેર નબળો રહેશે પરંતુ ₹600થી 620ના સ્તરે આ શેર ખરીદવા માટે વિચારી શકાય.”

કેલેન્ડર વર્ષ 2019માં શુક્રવાર સુધીમાં ઇન્ફોસિસનો શેર 16.3 ટકા વધ્યો હતો જ્યારે ટીસીએસમાં 8.65 ટકાનો વધારો થયો હતો. ઇન્ફોસિસ પાસેથી આશા રાખવામાં આવતી હતી કે તેના સ્થિર મેનેજમેન્ટ સ્ટ્રક્ચરના કારણે તે વધુ સારું અર્નિંગ પરફોર્મન્સ નોંધાવશે. સપ્ટેમ્બર ક્વાર્ટરમાં ઇન્ફોસિસની રેવન્યુમાં ક્રમિક ધોરણે 3.3 ટકાનો વધારો થયો હતો. જે ટીસીએસના 1.6 ટકા કરતાં બમણો હતો.

સ્થાપકો અને બોર્ડ વચ્ચેના વિવાદના કારણે ભૂતકાળમાં ઇન્ફોસિસના વેલ્યુએશનને અસર થઈ છે. સ્થાપકોએ કંપનીના કોર્પોરેટ ગવર્નન્સ, ટોચના એક્ઝિક્યુટિવ્સના ઊંચા પગાર, ભૂતપૂર્વ સીએફઓ રાજીવ બંસલને જોબ છોડતી વખતે આપવામાં આવેલા જંગી પેકેજ અને પનાયાના ખર્ચાળ એક્વિઝિશન સામે વિરોધ નોંધાવ્યો હતો. આ તમામના કારણે તત્કાલિન સીઇઓ વિશાલ સિક્કાએ તે વર્ષે ઓગસ્ટમાં રાજીનામું આપ્યું હતું. 2017માં ઇન્ફોસિસનો શેર માત્ર 2.3 ટકા વધ્યો હતો જ્યારે બીએસઇ આઇટી ઇન્ડેક્સમાં સમાન ગાળામાં 10.8 ટકા વધારો થયો હતો.