SBIમાં લોકર ખોલાવવું હોય તો પહેલા જાણી લેજો આ મહત્વના નિયમો

અમદાવાદ: ઘરમાં જ્વેલરી, ડૉક્યુમેન્ટ્સ સહિતની કિમતી વસ્તુઓ રાખવામાં જોખમ રહેલું હોય છે. તેવામાં ઘણા લોકો આવી વસ્તુઓ સચવાઈ રહે તે માટે બેંકમાં લોકર ખોલાવતા હોય છે. દેશની સૌથી મોટી બેંક SBI પણ અલગ-અલગ સાઈઝમાં લોકર ઓફર કરે છે. જોકે, લોકર ખોલાવતા પહેલા તમારે કેટલીક વસ્તુઓ જાણી લેવી જરુરી છે.

બેંક દ્વારા ઓફર કરવામાં આવતી અલગ-અલગ સર્વિસમાંની એક છે લોકર સર્વિસ. જે વ્યક્તિએ લોકર ખોલાવ્યું હોય તે પોતે કે પછી તેના વારસદારો જ લોકરને ખોલી શકે છે. ઘણા કિસ્સામાં હિન્દુ અવિભક્ત કુટુંબ, પેઢીઓ અને ટ્રસ્ટના નામે પણ લોકર હોય છે.

તમારે જે બ્રાન્ચમાં લોકર લેવું હોય તેમાં તમારું બેંક અકાઉન્ટ પણ હોવું જરુરી છે. SBIની જ વાત કરીએ તો, તેણે 31 માર્ચથી લોકરના ભાડામાં વધારો કર્યો છે. લોકરનું ભાડું શહેરી, ગ્રામીણ, અર્ધ-શહેરી તેમજ મેટ્રો સિટીમાં જૂદું-જૂદું હોય છે.

કઈ સાઈઝના લોકરનો કેટલો ચાર્જ?

જેમ કે, મેટ્રો કે શહેરી વિસ્તારમાં સ્મોલ સાઈઝનું લોકર ખોલાવવાનું વાર્ષિક ભાડું 2,000 રુપિયા છે. જ્યારે લાર્જ સાઈઝના લોકરનો ચાર્જ 8,000 રુપિયા પ્રતિ વર્ષ છે. આ ચાર્જમાં જીએસટી અલગથી ભરવાનો રહે છે.

સ્મોલ લોકર
શહેરી વિસ્તાર- રુ. 2000+GST
ગ્રામ્ય વિસ્તાર- રુ. 1500+GST

મિડીયમ સાઈઝ લોકર
શહેરી વિસ્તાર- રુ. 4000+GST
ગ્રામ્ય વિસ્તાર- રુ. 3000+GST

લાર્જ સાઈઝ લોકર
શહેરી વિસ્તાર- રુ. 8000+GST
ગ્રામ્ય વિસ્તાર- રુ. 6000+GST

એક્સ્ટ્રા લાર્જ લોકર
શહેરી વિસ્તાર- રુ. 12,000+GST
ગ્રામ્ય વિસ્તાર- રુ. 9000+GST

રજિસ્ટ્રેશન ચાર્જ
સ્મોલ અને મિડીયમ લોકર માટે રુ. 500+GST
લાર્જ અને એક્સ્ટ્રા લાર્જ લોકર માટે રુ. 1,000+GST
(વન ટાઈમ ચાર્જ)

લોકર વિઝિટ ચાર્જ
તમે વર્ષમાં કોઈપણ સાઈઝનું લોકર 12 વાર નિ:શુલ્ક ખોલી શકો છો, ત્યારબાદ દરેક વિઝિટના રુ. 100+GST લાગે છે.

કયા ડૉક્યુમેન્ટ્સ આપવા પડે?

લોકર ઓપન કરાવવા માટે તમારે KYC ડૉક્યુમેન્ટ્સ તેમજ ફોટોગ્રાફ્સ આપવા પડશે.

આ સિવાય બેંક તમને લોકરનું ત્રણ વર્ષનું ભાડું અને તેને તોડવાનો ચાર્જ વસૂલ શકે તેટલા વ્યાજની રકમની એફડી કરાવવાનું પણ કહી શકે છે. તમારા અકાઉન્ટમાંથી લોકરનો ચાર્જ સીધો કપાઈ જાય તે માટે પણ બેંક તમારી સહમતી લઈ શકે છે.

લોકર અંગે બીજી પણ એક મહત્વની વાત એ છે કે જો લોકરધારક કે તેના વારસદાર ભાડું ચૂકવતા હોવા છતાં જો સતત એક વર્ષ (હાઈ-રિસ્ક કેટેગરીમાં આવતા લોકરધારક માટે) અથવા ત્રણ વર્ષ (લૉ-રિસ્કમાં આવતા લોકરધારક માટે) સુધી લોકર ઓપરેટ ના કરો તો બેંક તમને તાત્કાલિક લોકર ઓપરેટ કરવા કે પછી સરેન્ડર કરવા માટે કહી શકે છે.