નવી દિલ્હી: અલીબાબા ગ્રુપ હોલ્ડિંગ લિમિટેડની સબ્સિડરી યુસીવેબ (ucweb)એ ભારતમાંથી પોતાનો બિઝનેસ સમેટવાનું શરૂ કરી દીધું છે. ભારત દ્વારા ચીનની 59 મોબાઈલ એપ પર પ્રતિબંધ મૂકાયા બાદ હવે યુસીવેબએ આ પગલું ભર્યું છે, કેમકે પ્રતિબંધિત કરાયેલી આ એપમાંથી એક યુસી વેબ પણ છે. ભારતમાં આ કંપનીએ સ્ટાફને નોકરીમાંથી કાઢવાનું શરૂ કરી દીધું છે. ઉલ્લેખનીય છે કે, પ્રતિબંધિત કરાયેલી એપમાં કંપનીની બે અન્ય એપ સામેલ છે.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: https://t.me/iamgujaratofficial
ગત મહિને જ ભારત અને ચીનની સેના વચ્ચે લદાખમાં થયેલી હિંસક અથડામણમાં ભારતના 20 જવાન શહીદ થયા હતા. તે પછીથી જ ભારતે ચીનની સામે મોરચો ખોલી દીધો હતો. દેશમાં પણ ચીનને લઈને લોકોમાં ગુસ્સો છે, જેના કારણે તે ચીનના સામાનનો બહિષ્કાર કરવાની વાત કરી રહ્યા છે. ચીનની 59 એપ પર પ્રતિબંધ મૂકવાનું કારણ પણ એ જ હતું, કેમકે સરકારનું માનવું હતું કે, આ એપ્સના કારણે ભારતની સુરક્ષાને ખતરો છે. મોદી સરકારના આ પગલાંને ડિજિટલ સ્ટ્રાઈક પણ કહેવાઈ.
આ બે કંપનીઓએ પણ બંધ કર્યો બિઝનેસ
યુસી બ્રાઉઝરે તો પોતાનો બિઝનેસ સમેટ્યો જ છે, સાથે-સાથે જ વીમેટ (vmate) અને યુસી ન્યૂઝ (uc news)એ પણ પોતાનો વાવટો સમેટવાની પૂરી તૈયારી કરી લીધી છે. યુસી બ્રાઉઝરે કંપનીની ગુરુગ્રામ અને મુંબઈની ઓફિસ બંધ કરી દીધી છે. ન્યૂઝ એજન્સી રોયટર્સ મુજબ, 15 જુલાઈએ એક લેટર મોકલી બધા કર્મચારીઓને તેની જાણ કરવામાં આવી છે. એટલું જ નહીં, ક્લબ ફેક્ટરીએ ચૂકવણી કરવાનું પણ રોકી દીધું છે.