ભારતના વિકાસ અને GST પર બિલ ગેટ્સે શું કહ્યું?

નવી દિલ્હી: માઈક્રોસોફ્ટના ફાઉન્ડર બિલ ગેટ્સે ગુરુવારે કહ્યું કે, જો ભારત આગામી 20 વર્ષ સુધી ન્યાયસંગત રસ્તે સરેરાશ 7 ટકાના દરે વિકાસ કરે તો તે દેશ માટે મોટી ઉપલબ્ધિ હશે. ગેટ્સે ગુડ્સ એન્ડ સર્વિસીઝ ટેક્સ (જીએસટી)ને સકારાત્મક પગલું ગણાવ્યું. ઓબ્ઝર્વર રિસર્ચ ફાઉન્ડેશન અને બિલ મિલિંડા ગેટ્સ ફાઉન્ડેશન તરફથી આયોજિત એક પેનલ ડિસ્કશનમાં ભાગ લેતા તેમણે કહ્યું કે, ‘જો ભારત આગામી 20 વર્ષ સુધી સરેરાશ 7 ટકાની ગતિએ વિકાસ કરી શકશે તો અને જો તે ન્યાયસંગત રીતે હોય તો તે દેશ અને દુનિયા માટે ચમત્કાર હોઈ શકે છે.’ ગેટ્સે એવી પણ આશા વ્યક્ત કરી કે ભારતનો ટેક્સ જીડીપી સરેરાશ વધવાની શક્યતા છે અને એટલે સરકાર પાસે સ્વાસ્થ્ય, શિક્ષણ અને પોષણ પર ખર્ચ કરવા માટે વધારાનો સ્ત્રોત હશે. જોકે, તેમણે અફસોસ વ્યક્ત કર્યો કે, અમેરિકામાં પરોપકારિતા સમગ્ર આર્થિક ગતિવિધિના 2 ટકા છે, પરંતુ ભારતમાં તે 0.2 ટકાથી પણ ઓછી છે. આ કાર્યક્રમમાં નાણાં મંત્રાલયના મુખ્ય આર્થિક સલાહકાર સંજીવ સાન્યાલએ કહ્યું કે, સરકારને સ્વાસ્થ્ય અને શિક્ષણ પર વધુ ખર્ચ કરવો જોઈએ. તેમણે કહ્યું કે, ‘વધતી અર્થવ્યવસ્થામાં આશા છે કે, અમને હજુ વધારે ટેક્સ મળશે અને સ્વાસ્થ્ય-શિક્ષણ પર અમે વધુ ખર્ચ કરી શકીશું.’