બચ્ચનની આ વાત સાંભળી મુકેશ અંબાણીની આંખો થઈ ભીની!

I am Gujarat

બીગ બીએ ધીરુભાઈ અંબાણીને કર્યા યાદ

બોલિવૂડના મેગાસ્ટાર અમિતાભ બચ્ચને એક કાર્યક્રમમાં ભારતના સફળતમ ઉદ્યોગપતિ ધીરુભાઈ અંબાણીની દરિયાદિલીની વાત કહી તો સામે બેઠેલા રિલાયન્સ ઈન્ડસ્ટ્રીઝના ચેરમેન અને ધીરુભાઈ અંબાણીના મોટા પુત્ર મુકેશ અંબાણી આંખોમાં આસૂ આવી ગયા. બિગ બી રિલાયન્સ ઈન્ડસ્ટ્રીઝના વાર્ષિક સમ્મેલનમાં વક્તવ્ય આપી રહ્યાં હતા. બચ્ચને જણાવ્યું કે, જ્યારે 90ના દશકમાં તેમનું દેવાળું નિકળી ગયું હતું ત્યારે ધીરુભાઈએ તેમની તરફ મદદનો હાથ લંબાવ્યો હતો.

આ રીતે બની ‘રિલાયન્સ’

જોકે, બચ્ચને આ પ્રસ્તાવને વિનમ્રતાપૂર્વક ટાળી દીધો હતો. આ કાર્યક્રમમાં રિલાયન્સ ઈન્ડસ્ટ્રીઝના લગભગ 80 હજાર કર્મચારીઓ અને અધિકારીઓ ઉપસ્થિત રહ્યાં. બિગ બીએ કહ્યું કે, ધીરુભાઈનું માનવું હતું કે, લોકોમાં ખુશીઓ વહેચવાની સાથે-સાથે પોતિકાપણું વહેંચવાથી વિશ્વાસ વધે છે. કદાચ આ માટે જ તેમણે પોતાની કંપનીને ‘રિલાયન્સ’ નામ આપ્યું.

મુશ્કેલીમાં ધીરુભાઈએ લંબાવ્યો મદદનો હાથ

અમિતાભ બચ્ચને કહ્યું કે, તેમની કંપની ABCL સતત નુકસાનમાં ચાલી રહી હતી. તેમણે કહ્યું, ‘હું દેવાળિયો થઈ ગયો હતો. લૉન આપનારા સતત દરવાજા ખખડાવી રહ્યાં હતા. ધીરુભાઈને જ્યારે આ અંગે જાણ થઈ ત્યારે તેમણે પોતાના નાના પુત્ર અનિલ અંબાણીને મોકલ્યા અને મને થોડા પૈસા આપવાનું કહ્યું. તેઓ જેટલું આપવા માગતા હતા તેનાથી મારી તમામ મુશ્કેલીઓ ખતમ થઈ શકે તેમ હતી. હું તેમની ઉદારતા પર ભાવુક થઈ શક્યો હતો પણ હું તે સ્વીકારી ન શક્યો. ભગવાનની કૃપાથી મારી હાલત ધીમે-ધીમે સુધરી અને મને કામ મળવા લાગ્યું. હું દેવું ચૂકવવામાં સફળ રહ્યો.’

આ સેલિબ્રિટીઝ રહ્યાં ઉપસ્થિત

બિગ બીએ જણાવ્યું કે, ધીરુભાઈએ લાખો લોકોની સ્થિતિમાં સુધારો કર્યો. બચ્ચન ઉપરાંત કાર્યક્રમમાં શાહરુખ ખાન, રણબીર કપૂર અને સોનૂ નિગમ જેવા બોલિવૂડ સેલિબ્રિટી પણ હાજર હતા.

જ્યારે ધીરુભાઈએ કરી બચ્ચનની પ્રશંસા

તેમણે વધુ એક પ્રસંગ યાદ કરતા કહ્યું કે, ‘ધીરુભાઈના ઘરે એક કાર્યક્રમમાં મને આમંત્રિત કરવામાં આવ્યો હતો. આ કાર્યક્રમમાં ધીરુભાઈએ બધા ઉદ્યોગપતિઓની વચ્ચે કહ્યું કે, ‘આ છોકરો પડી ગયો હતો પણ પોતાના દમ પર ફરી ઊભો થયો. એટલું હું તેનું સન્માન કરું છું.’ ધીરુભાઈના આ શબ્દો મારા માટે તેમના દ્વારા આપવામાં આવેલી રકમથી અનેક ઘણા મૂલ્યવાન હતા.’