Yes Bankના શેરમાં ફરી ગાબડું, ઝુનઝુનવાલાને બેંકની ઓફરમાં રસ ના પડ્યો?

મુંબઈ: Yes Bankના શેરમાં ફરી એકવાર કડાકો બોલાયો છે. બિગ બુલ રાકેશ ઝુનઝુનવાલા બેંકમાં 25 મિલિયન ડોલર રોકવા નિરુત્સાહી હોવાના અહેવાલે બેંકનો શેર આજે 10 ટકાના કડાકા સાથે 50.40 રુપિયાના સ્તરે બંધ થયો હતો. આજે માર્કેટ ખૂલ્યા બાદ 55.80 રુપિયાની ટોચની સપાટીને સ્પર્શ્યા બાદ શેર 50.20 રુપિયાની સૌથી નીચલી સપાટીએ પહોંચીને છેલ્લે 50.40 પર બંધ આવ્યો હતો. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો Yes Bankના શેર્સ રાકેશ ઝુનઝુનવાલાએ ખરીદ્યા છે તેવા અહેવાલને પગલે બેંકનો શેર જોરદાર કડાકા બાદ હજુ 11 નવેમ્બરે જ ખાસ્સી રિકવરી દર્શાવીને 73 રુપિયાની સપાટી પર પહોંચ્યો હતો. ઉલ્લેખનીય છે કે, વધતી જતી NPA તેમજ અન્ય પ્રશ્નોને કારણે Yes Bankનો શેર પાછલા છ મહિનાની 139.55 રુપિયાની સર્વોચ્ચ સપાટીથી ગબડીને 1 ઓક્ટોબરના રોજ 32 રુપિયાની પોતાની ઐતિહાસિક નીચલી સપાટી પર આવી ગયો હતો. રાકેશ ઝુનઝુનવાલા અંગેના અહેવાલને બેંકે સંપૂર્ણ પણે અટકળો પર આધારિત ગણાવ્યો છે. બેંક હાલમાં બજારમાંથી મૂડી ઉભી કરવાના પ્રયાસ કરી રહી છે. જો કે તેમાં અનિશ્ચિતતા સર્જાતા બેંકનો શેર છેલ્લા કેટલાક દિવસોથી સતત ઘટી રહ્યો છે. એક અહેવાલ અનુસાર, ઝુનઝુનવાલા પોતાના નિર્ણય અંગેનો સત્તાવાર પત્ર ગમે ત્યારે જાહેર કરે તેવી શક્યતા છે. એક અખબારના જણાવ્યા અનુસાર, બેંકના પ્રેફરેન્શિયલ અલોટમેન્ટમાં રુપિયા રોકવામાં ઝુનઝુનવાલા કેટલાક કારણોસર અચકાઈ રહ્યા છે. જેમાં બજાર કિંમત કરતાં ઉંચી ઓફર તેમજ તેમાં રહેલો લોક-ઈન પીરિયડ પણ જવાબદાર છે. બેંકની આ ઓફરના બદલે બિગ બુલ ઓપન માર્કેટમાંથી નીચા ભાવે શેર ખરીદવાનું વધુ પસંદ કરશે તેવું પણ ચર્ચાઈ રહ્યું છે, કારણકે તેમાં તેમને કોઈ લોક-ઈન પીરિયડ પણ નહીં નડે. 4 નવેમ્બરના રોજ ઝુનઝુનવાલાએ યસ બેંકના 1.3 કરોડ શેર્સ 87 કરોડ રુપિયામાં ખરીદ્યા હતા. જો કે આ તમામ ખરીદી ઓપન માર્કેટમાંથી થઈ હતી. ભારતીય શેરબજારના વોરેન બફેટ કહેવાતા ઝુનઝુનવાલાએ Yes Bankનો શેર 67.10 રુપિયાના ભાવે ખરીદ્યો હતો. આ ખરીદી સાથે જ બેંકમાં તેમનો હિસ્સો અડધો ટકો થઈ ગયો છે. જો કે ઝુનઝુનવાલાએ જે ભાવે ખરીદી કરી તેના કરતાં હાલ આ શેરનો ભાવ ઘણો નીચે આવી ચૂક્યો છે.