લોન ન ચૂકવી શકતા Yes Bankએ અનિલ અંબાણી ગ્રુપના હેડક્વોર્ટર પર કબજો કર્યો

એક સમયે દુનિયાના છઠ્ઠા નંબરના સૌથી અમીર વ્યક્તિ રહેલા અનિલ અંબાણીને પોતાનું હેડક્વોર્ટર ગુમાવવું પડી રહ્યું છે. તેમના અનિલ ધીરુભાઈ અંબાણી ગ્રુપ (ADAG)ના મુંબઈ સ્થિત રિલાયન્સ સેન્ટરને યસ બેંકે પોતાના નિયંત્રણમાં લઈ લીધું છે. બેંકે 21,000 ચોરસ ફૂટની બિલ્ડીંગ અને સાઉથ મુંબઈમાં નાગિન મહેલના બે માળના પઝેશન માટે ન્યૂઝપેપરમાં જાહેરાત આપી હતી. અનિલ અંબાણી તરફથી 2892 કરોડ રૂપિયાની લોન ન ચૂકવાયા બાદ બેંકે આ કાર્યવાહી કરી છે.

બિલ્ડીંગનું પઝેશન 22 જુલાઈએ SARFESI એક્ટ હેઠળ લેવાયું હતું. પબ્લિક નોટિસમાં યસ બેંકે જણાવ્યું છે કે, કંપની દેવું ચૂકવવામાં નિષ્ફળ રહેતા તેણે પૈસાની રિકવરી માટે રિલાયન્સ ઈન્ફ્રાસ્ટ્રક્ચરને SARFESI હેઠળ નોટિસ મોકલી હતી. તેણે પઝેશન નોટિસ પણ પાઠવી હતી.

જણાવી દઈએ કે અનિલ અંબાણી ગ્રુપ પર યસ બેંકનું 12,000 કરોડ રૂપિયાનું દેવું છે. આ વર્ષે માર્ચમાં જ EDની પૂછપરછમાં અનિલ અંબાણીએ કહ્યું હતું કે યસ બેંકથી તેમણે જે લોન લીધી છે, જે સંપૂર્ણ રીતે સેફ છે. તેમણે કહ્યું હતું કે, યસ બેંકનું બધું દેવું તેઓ ચૂકતે કરશે પછી તેના માટે પોતાની પ્રોપર્ટી પણ વેચશે.

તો બીજી તરફ લોન આપવામાં અનિયમિતતા મામલે પૂછપરછ દરમિયાન અનિલ અંબાણીએ બેંકના પૂર્વ ડાયરેક્ટર રાણા કપૂર, તેમની પત્ની અથવા દીકરી કે પછી તેમના નિયંત્રણમાં રહેલી કોઈ કંપની સાથે સંબંધ ન હોવાનું જણાવ્યું હતું. EDએ મે મહિનામાં જ રાણા કપૂર અને તેમની દીકરીઓ વિરુદ્ યસ બેંક ફ્રોડ કેસમાં ચાર્જશીટ દાખલ કરી છે. હાલમાં બેંકના ડાયરેક્ટર તરીકે પ્રશાંત કુમાર કામકાજ સંભાળી રહ્યા છે.

આ પણ જુઓઃ આ વર્ષે નવરાત્રિ પર થશે ગરબાનું આયોજન? મંજૂરી લેવા આયોજકો CMને મળ્યા