ગોધરામાં ટ્રેનના ડબ્બાને પેટ્રોલ છાંટી કાકડો ફેંકનારો 14 વર્ષ પછી પકડાયો

નવગુજરાત સમય > અમદાવાદ

– ગોધરામાં વર્ષ ૨૦૦૨માં સાબરમતી એક્સપ્રેસના એસ-૬ કોચમાં આગ લગાડવાના કેસમાં મુખ્ય આરોપીઓ પૈકીનો એક ઈમરાન ભટુક ઉર્ફે શેરુ ૧૪ વર્ષ પછી પકડાયો છે. અમદાવાદ ક્રાઈમ બ્રાન્ચે સતત છ મહિના માહિતી એકત્ર કર્યા બાદ મહારાષ્ટ્રના માલેગાંવમાં પરિવાર સાથે સ્થાયી થયેલા ઈમરાનને પકડી પાડવામાં સફળતા મેળવી છે. વર્ષ ૨૦૦૨ની ૨૭મી ફેબ્રુઆરીએ ગોધરામાં સાબરમતી એક્સપ્રેસને રોકીને એસ-૬ કોચને આગ ચાંપવામાં આવી હતી. આ કેસમાં તોફાનીઓનું ટોળું ટ્રેનના કોચનું વેસ્ટીબ્યુલ (બે ડબ્બાને જોડતો ભાગ) ચીરીને એસ-૬ કોચમાં પ્રવેશ્યા હતા. ટેમ્પી (ટેમ્પો)માં બેસીને આવેલા તોફાનીઓએ ૧૬૦ લિટર પેટ્રોલ છાંટીને બહારથી કાકડા ફેંકીને આગ ચાંપી હતી. આ ટોળામાં એક આરોપી, ગોધરાની મુસ્લિમ-એ સોસાયટીમાં રહેતો ઈમરાન ઉર્ફે શેરુ એહમદ ભટુક (ઘાંચી) હતો. આરોપી તરીકે નામ ખુલતાં જ ઈમરાન ગોધરાથી નાસી છૂટ્યો હતો. ક્રાઈમ બ્રાન્ચના JCP જે.કે. ભટ્ટે કહ્યું કે, ગોધરામાં નોકરી કરી ચૂકેલા PSI જે.એન. ચાવડાને મહત્વના આરોપી ઈમરાન ઉર્ફે શેરુની ભાળ મેળવવા છ મહિનાથી કામે લગાવાયા હતા. આખરે, પાક્કી માહિતી મળી હતી કે ઈમરાન મહારાષ્ટ્રના માલેગાંવમાં પરિવાર સાથે રહે છે. માલેગાંવના પૂર્વ મેયરને ત્યાં રેતીની ટ્રકમાં નોકરી કરી ચૂકેલો શેરુ હવે ભાડાની રિક્ષા ચલાવી ગુજરાન ચલાવતો હતો. માલેગાંવના મોહનબાબા નગરમાં અમદાવાદ ક્રાઈમ બ્રાન્ચની ટીમે વોચ ગોઠવી હતી અને ચંદનપુરી નાકા પાસેથી તેને પકડી પાડ્યો હતો. ભાગ્યો ત્યારે શેરુ 22 વર્ષનો હતો અને તેણે લગ્ન કર્યા હતા. તેણે ધુલીયાની વતની, પત્નીને પણ આ કાંડની વાત કરી નહોતી. નંદુરબાર, ધુલીયા પછી માલેગાંવમાં સ્થાયી થયેલા શેરુને ગોધરા રેલવે કાંડની તપાસ કરતાં પંચના હવાલે કરાશે.

ગોધરા ટ્રેન કાંડ કેસ 27-2-2002 S-6 કોચને આગ ચાંપતા 59 યાત્રીના મોત 94 આરોપી પકડાયા 31 આરોપીને સજા 10 આરોપીને ફાંસી 20 આરોપીને આજીવન કેદ 62 આરોપી નિર્દોષ 13 આરોપી CRPC 169 મુજબ મુક્ત 05 બાળઆરોપી હતા 05 ટ્રાયલ દરમિયાન મૃત્યુ 06 આરોપી પકડવાના બાકી