આંગડિયાના 17 લાખ લૂંટનારી છારા ગેંગના 3 પકડાયા

નવગુજરાત સમય > અમદાવાદ

આંગડિયા પેઢીના કર્મચારીની આંખમાં મરચાની ભૂકી નાંખ્યા બાદ માથામાં બેટ ફટકારીને ૧૭.૪૦ લાખની લૂંટ કરનારા પાંચ પૈકી છારા ગેંગના ત્રણ સભ્યોની ક્રાઈમ બ્રાન્ચે ધરપકડ કરી છે. પોલીસે ત્રણ પાસેથી ૫ લાખ રૂપિયાની રોકડ અને ૧ લાખની બાઈક કબજે કરી છે. પોલીસનો દાવો છે કે, ત્રણેય આરોપી રીઢા ગુનેગાર છે અને અગાઉ દારૂ, ચેઈન સ્નેચિંગ, ધાડ અને લૂંટ જેવા ગુનામાં વિવિધ પોલીસ સ્ટેશનમાં પકડાઈ પણ ચુક્યાં છે. નોંધનીય છે કે, દોઢેક મહિના પહેલા પાંચેય શખ્સો લૂંટના ઈરાદે બાઈક પર નીકળ્યાં હતા ત્યારે બપોરે બગોદરાથી ધોળકા તરફ એક્ટિવા પર પૈસા ભરેલી બેગ લઈને આવી રહેલા આંગડિયા પેઢીના કર્મચારીને અટકાવી તેને લૂંટી લીધો હતો. લૂંટેલા રૂપિયા પૈકી ૫ લાખ અલગ કાઢી બાકીના રૂપિયા સરખાભાગે વેચી લીધા હતા.
ક્રાઈમ બ્રાન્ચના પીએસઆઈ આર. આઈ. જાડેજા અને એસ.એન. દેસાઈની ટીમે એક બાતમીના આધારે નોબલનગર ઈન્ડિકેપ ત્રણ રસ્તા પાસેથી આકાશ ઉર્ફ પ્રકાશ ઈન્દ્રેકર (ઉં.૨૪, રહે. સિલ્વર જ્યોત સો. કુબેરનગર), વિષ્ણુ ઉર્ફ કાલુ દીનેશ ગારંગે (ઉં.૨૨, રહે. ચાલીસ મકાન, કુબેરનગર) અને શુસાંત ઉર્ફ વિક્કી વિનુ ઈન્દ્રેકર (ઉં. ૩૦, રહે. ફી કોલોની, છારાનગર)ને પકડી તેમની પાસેથી ૫ લાખ અને ૧ લાખની કિંમતનું એક બાઈક કબજે કર્યું હતું. રૂપિયા અંગે પુછતા આરોપીઓએ કબૂલાત કરી હતી કે, તેમણે દોઢેક મહિના પહેલા એક આંગડિયા પેઢીના કર્મચારીની આંખમાં મરચાની ભૂકી નાંખી લૂંટ્યા હતા. પોલીસે ત્રણેયની ધરપકડ કરી હતી.
પુછપરછમાં આરોપીઓએ કબૂલાત કરી હતી કે, તેમના ઉપરાંત વધુ બે આરોપી સંજય અને તેનો એક મિત્ર એમ પાંચેય બાઈક પર લૂંટ કરવાના ઈરાદે નીકળ્યાં હતા. વિશાલા સર્કલ થઈ ધોળકાવાળા રોડ પર પસાર થઈ રહ્યાં હતા ત્યારે બગોદરા તરફથી એક્ટિવા પર બેગ ભરાવીને આવી રહેલા એક યુવકને જોયો હતો. જેનો ઓવર ટેક કરીને પાંચેય આગળ સૂમસામ જગ્યા પર ઊભા રહી ગયા હતા અને તે નજીક આવતા તેને અટકાવી આંખમાં મરચાની ભૂકી નાંખી અને માથામાં બેટ ફટકારી તેને ઘાયલ કર્યો હતો. દરમિયાન એક્ટિવા પર ભરાવેલી બેગ લૂંટીને નાસી છુટ્યાં હતા. બેગ ખોલતા તેમાંથી ૧૭.૪૦ લાખ રૂપિયા મળ્યાં હતા. જે પૈકી ૫ લાખ અલગ કાઢીને બાકીના રૂપિયાના ભાગ પાડ્યાં હતા.