અમદાવાદની વધુ એક હોસ્પિટલમાં યુવતીની છેડતી

નવગુજરાતસમય.કોમ

અમદાવાદની એપોલો હોસ્પિટલમાં સારવાર લઈ રહેલી યુવતી પર ડોક્ટર અને કમ્પાઉન્ડરે બળાત્કાર ગુજાર્યો હોવાની ઘટના હજુ તાજી જ છે, ત્યારે શહેરની વધુ એક ખાનગી હોસ્પિટલમાં આવો જ એક ચોંકાવનારો મામલો સામે આવ્યો છે. ટીવી રિપોર્ટ્સ અનુસાર, અમદાવાદની તપન હોસ્પિટલમાં વોર્ડબોય દ્વારા સારવાર લઈ રહેલી યુવતીને કથિત અડપલાં કરવામાં આવ્યા છે. આ યુવતી ડેન્ગ્યુની પેશન્ટ છે, અને સોમવારે રાત્રે વોર્ડબોય તેનું ટેમ્પરેચર લેવા ગયો ત્યારે આ ઘટના બની હોવાનું પોલીસ ફરિયાદમાં જણાવાયું છે.

પશ્ચિમ અમદાવાદના પોશ વિસ્તારમાં આવેલી તપન હોસ્પિટલમાં સારવાર લઈ રહેલી યુવતી સાથે આ બનાવ બનતા હોસ્પિટલમાં યુવતીઓની સુરક્ષા સામે સવાલ ઉભા થઈ રહ્યા છે. યુવતી સાથે ઘનશ્યામ નામના વોર્ડબોયે અડપલાં કર્યાનો આરોપ છે. ગઈ કાલે રાત્રે બનેલી આ ઘટનાની યુવતીએ પોતાના પરિવારજનોને જાણ કરતાં સમગ્ર મામલો પ્રકાશમાં આવ્યો હતો. હાલ આનંદનગર પોલીસે ઘનશ્યામ નામના વોર્ડબોયની ધરપકડ કરીને વધુ તપાસ હાથ ધરી છે. પોલીસે હોસ્પિટલના સીસીટીવી પણ કબજે કર્યા છે.

પ્રાપ્ત વિગતો અનુસાર, શ્યામલ ચાર રસ્તા પાસે આવેલી તપન હોસ્પિટલમાં વોર્ડબોય તરીકે ફરજ બજાવતો ઘનશ્યામ સોમવારે રાત્રે ડેન્ગ્યુની સારવાર લઈ રહેલી એક યુવતીનું ટેમ્પરેચર લેવા ગયો હતો. આ વખતે ઘનશ્યામે યુવતીની બગલમાં થર્મોમીટર મીટર લગાવી રાખીને તેને અડપલાં કર્યા હતા.