ગોમતીપુરમાં જુગારના અડ્ડા પર દરોડોઃ સૂત્રધાર સહિત 20 ઝડપાયા

નવગુજરાત સમય > અમદાવાદ

– સુરત જિલ્લાના કથિત લઠ્ઠાકાંડ બાદ રાજ્યના મુખ્યપ્રધાન વિજય રૂપાણીએ વીડિયો કોન્ફરન્સથી તમામ જિલ્લા પોલીસ વડા અને કમિશનરને દારૂ-જુગારના અડ્ડાઓ પર કાર્યવાહી કરવાની સૂચના આપી હતી, ત્યારબાદ રાજ્યના પોલીસ વડાએ પણ કડક કાર્યવાહીનો હુકમ કરતા રાજ્યમાં ઠેરઠેર દારૂ-જુગારના અડ્ડાઓ પર દરોડા પાડવામાં આવી રહ્યાં છે. આવી જ એક કાર્યવાહીના અનુસંધાને ગોમતીપુર પોલીસે વિસ્તારના કુખ્યાત હુસૈન બટકાને ત્યાં દરોડો પાડી તેના સહિત 20 જુગારીઓની રંગે હાથે ધરપકડ કરી હતી.
ગોમતીપુર પોલીસ સ્ટેશનના સિનિયર ઈન્સ્પેક્ટર એ.આર. જનકાત અને સર્વેલન્સ સ્કવોડના પીએસઆઈ વી.ડી. મોરીને બાતમી મળી હતી કે, ગોમતીપુર ઢાળ નજીક રહેતા કુખ્યાત હુસૈન બટકાના ત્રણેક મકાન આવેલા છે. જેમાં કેટલાક સમયથી જુગાર રમાડવામાં આવી રહ્યો છે. આ બાતમીના આધારે પોલીસે દરોડો પાડી સૂત્રધાર હુસૈન બટકો અને જુગાર રમવા આવેલા અન્ય જુગારીઓ મળી કુલ 20ની જુગાર રમતા રંગેહાથ ધરપકડ કરી હતી. પોલીસે સ્થળ પરથી 61 હજારની રોકડ રકમ અને જુગાર રમવાના સાધનો કબજે કરી તપાસ શરૂ કરી છે.
નોંધનીય છે કે, અમદાવાદ શહેર પોલીસે દારૂના સ્ટેન્ડ પર બોલાવેલી ‘તવાઈ’ને પગલે શહેર અનેક બૂટલેગરો ભૂગર્ભમાં ઉતરી ગયા છે. આગામી દિવસોમાં પણ આ જ રીતે દારૂબંદીની આ રીતે અમલવારી કરવાય તો કાયદો અને વ્યવસ્થા જળવાઈ રહે તેવી લોકમાંગ ઉઠી છે.