મુંબઈગરાના 90 લાખ તફડાવનારી ગેંગના ગઠિયાને ક્રાઈમ બ્રાન્ચે પકડ્યો

નવગુજરાત સમય > અમદાવાદ

‘તમે અકસ્માત કરીને ભાગ્યા છો’, ‘તમારી કારીમાં પંક્ચર છે’ કે પછી સરનામું પુછવાના બહાને મુંબઈગરાઓની નજર ચુકવીને છેલ્લા છ મહિનામાં 90 લાખ રૂપિયા તફડાવનારી કુબેરનગરની ગેંગના એક ચબરાક ગઠિયાને ક્રાઈમ બ્રાન્ચે પકડી પાડ્યો છે. આ ગેંગની મહિલા સહિત ચાર આરોપીઓ હજુ પણ ફરાર છે, જ્યારે બે આરોપીઓ અગાઉ પકડાઈ ચુક્યા હતા. નોંધનિય છે કે, આ ગેંગ વિરુદ્ધ મુંબઈના અલગ અલગ સાત પોલીસ સ્ટેશનમાં ચોરીના ગુના નોંધાયેલા છે.

ક્રાઈમ બ્રાન્ચના પોલીસ ઈન્સ્પેક્ટર આર.આર. સરવૈયા અને ટીમના પોલીસ સબ ઈન્સ્પેક્ટર જે.એ. બારોટ અને પી.એસ.આઈ જે.એમ. જાડેજા ટીમ સાથે શનિવારે રાત્રે પેટ્રોલિંગમાં હતા ત્યારે મળેલી એક બાતમીના આધારે પોલીસે નોબલનગરના કુંદન દારૂવાળાના મકાનની બાજુમાં આવેલા ઘાંચી નગરમાંથી આરોપી સુશીલ દિલીપભાઈ ગારંગે (ઉં.35)ની ધરપકડ કરી હતી. સુશીલની પુછપરછમાં ખુલાસો થયો હતો કે, તે ગેંગના અજુબા, રૂપેશ, રાજપાલ, સંજય ઉર્ફ ગટુ, જયંતી નારણ અને સવિતાબહેન સાથે મળીને મુંબઈ જતો.

જ્યાં ડીંડોલ, બંગુરનગર, મલાડ, કંદિવલી, અંધેરી જેવા વિસ્તારમાં રેકી કરતા અને રૂપિયા લઈને નીકળતા હોય તેવા કાર ચાલકો કે ટુવ્હીલર ચાલકોને આંતરીને તેમની કોઈના કોઈ કારણસર નજર ચુકવતા હતા. કોઈ કાર ચાલકને તમારી કારમાં પંક્ચર છે તો કોઈને તમે અકસ્માત કરીને ભાગ્યા છો તો કોઈ બાઈકચાલકને રોકીને સરનામું પુછવાના બહાને અટકાવતા. આ દરમિયાન ગેંગના બીજા સભ્યો તેમના વાહનમાંથી રૂપિયા ભરેલી બેગ ચોરી લેતા હતા.

આ રીતે આ ગેંગે છેલ્લા છ મહિનામાં 89.60 લાખથી વધુની રોકડની ચોરી કરી હતી. લગભગ સાંતેક ગુનામાં આ આરોપીઓ વોન્ટેડ હતા. દરમિયાન થોડા સમય પહેલા મહારાષ્ટ્ર પોલીસે અજય ઉર્ફ અજુબા અને રૂપેશની ધરપકડ કરી હતી. જ્યારે આ ગેંગની ઠગ સવિતા છારા ઉપરાંત સંજય ઉર્ફ ગટુ, રાજપાલ ઈન્દ્રેકર અને જયંતી જાડેજા સહિત ચાર આરોપીઓ વોન્ટેડ છે. હાલ ક્રાઈમ બ્રાન્ચે સુશીલને મુંબઈ પોલીસના હવાલે કરવા તજવીજ હાથ ધરી બાકીના આરોપીઓની શોધખોળ શરૂ કરી છે.

ક્રાઈમ બ્રાન્ચે દાવો કર્યો છે કે, કુબેરનગરની આ ગેંગે છેલ્લા કેટલાક સમયથી મુંબઈમાં ચોરીઓ કરીને આતંક મચાવ્યો હતો.