બોગસ ચેકથી 99 લાખ ઉપાડવાનો પ્રયાસ કરનારા ત્રણ ઝબ્બે

નવગુજરાત સમય > અમદાવાદ

– છત્તીસગઢની કંપનીનો બોગસ ચેક બનાવી તેમાં 99.99 લાખ રૂપિયા ભરીને લીંબડીની એસ.બી.આઈ. બેન્કમાંથી રૂપિયા ઉપાડવાનો પ્રયાસ કરનારા ત્રણ શખ્સોની અમદાવાદ ક્રાઈમ બ્રાન્ચે વસ્ત્રાલ કેનાલ પાસેથી ધરપકડ કરી છે. જે તે સમયે બેન્ક મેનેજરની સતર્કતાથી ચેકનું ટ્રાન્જેક્શન અટકાવી દેવાયું હતું, જે અંગે છત્તીસગઢમાં ત્રણેય વિરૂધ્ધ ગુનો પણ નોંધાયો હતો. પોલીસે ત્રણેયને પકડીને છત્તીસગઢ પોલીસના હવાલે કરવા કાર્યવાહી શરૂ કરી છે.
ક્રાઈમ બ્રાન્ચના પી.આઈ. એસ.એલ. ચૌધરી અને સ્કવોડના પી.આઈ. ડી.એસ. ગોહિલની ટીમે બાતમીના આધારે વસ્ત્રાલ આર.ટી.ઓ. નજીક કેનાલ રોડ પરથી રસીદ ઉર્ફે યાસીન મોમીન (ઉં.૪૭, રહે. જહાંગીરમિલ વકીલની ચાલી, શાહીબાગ), સંતોષકુમાર જયરામ ચૌધરી (ઉં.૪૦, એકજોટીકા, વસ્ત્રાલ) તથા વિજય મફતલાલ પરમાર (ઉં.૩૫, રહે. પુરષોત્તમનગર, ઓઢવ)ને ગુરૂવારે સાંજે પકડી પાડ્યાં હતા. ત્રણેયની પૂછપરછ દરમિયાન ઘટસ્ફોટ થયો હતો કે, તેમણે છત્તીસગઢ રાયપુરની કંપની આસુતોષ એન્જિનિયરિંગ ઈન્ડ. કંપનીના નામનો બોગસ ચેક બનાવી તેમાં 99,99,800ની રકમ ભરી લીંબડી એસ.બી.આઈ. બેન્કમાં 1 જૂન 2016ના રોજ ભર્યો હતો. જો કે બેન્ક મેનેજરને શંકા જતા તેણે કંપનીમાં ટેલિફોનિક વેરિફિકેશન કર્યું હતું. કંપનીએ આવો ચેક ઈશ્યુ કર્યાનો ઈનકાર કરતા બેન્ક દ્વારા રૂપિયાનું ટ્રાન્જેક્શન રોકી દેવાયું હતું. આ ઘટના અંગે છત્તીસગઢના પોલીસ સ્ટેશનમાં ગુનો પણ નોંધાયો હતો. પોલીસે ત્રણેય આરોપીઓને છત્તીસગઢ પોલીસના હવાલે કરવા કાર્યવાહી શરૂ કરી છે