ઓપરેશન ‘અર્જુન વણઝારા’ ACB ડિરેક્ટરની જાણ બહાર જ થઇ ગયું!

નવગુજરાત સમય > અમદાવાદ

પૂર્વ સુપર કોપ અને એન્કાઉન્ટર સ્પેશિયાલિસ્ટ ડી.જી. વણઝારાના મામલતદાર પુત્ર અર્જુન વણઝારાને લાંચ કેસમાં પકડવાની આખી ઘટનાનો ઘાટ પોલીસવડા અને ACBના ડિરેક્ટર પી.પી. પાન્ડેયની જાણ બહાર જ ઘડાયો હોવાની ચર્ચા પોલીસ બેડામાં થઇ રહી છે. એન્કાઉન્ટર કેસમાં વણઝારાને કોર્ટે ગુજરાતમાં પ્રવેશ માટે મંજૂરી આપી ત્યારે તેમના સ્વાગત કાર્યક્રમમાં ખુદ પી. પી. પાન્ડેયએ વણઝારાને ‘રાજર્ષી’નું બિરૂદ આપ્યું હતું. ત્યારે હવે તેમની એજન્સીએ જ વણઝારાના પુત્રને ઝડપી લીધો! આ વાત કોઇના ગળે ઉતરતી નથી. જો કે એવી ચર્ચા પણ સાંભળવા મળી રહી છે કે ઓનલાઇન મળેલી ફરિયાદમાં મામલતદાર અર્જુન વણઝારાને ઝડપી લેવાયો છે. તેની જાણ જ પાન્ડેયને કરવામાં આવી નહોતી અને જ્યારે ‘ઓપરેશન અર્જુન વણઝારા’ની તેમને જાણ થઇ ત્યારે ઘણું મોડું થઇ ગયું હતું.

બીજી એવી પણ ચર્ચા સાંભળવા મળી રહી છે કે ડી.જી.‌વણઝારાએ ગુજરાત પ્રવેશની સાથે જ ગુજરાત ભ્રમણ શરૂ કરી દીધું છે. જે રીતે તેમના ઠેરઠેર સ્વાગત કાર્યક્રમો યોજાઇ રહ્યા છે. તે જોતાં તેઓ આગામી ચૂંટણીમાં પસંદગીની બેઠક પરથી ટિકિટ માંગે તેવી પ્રબળ શક્યતાઓ ઊભી થઇ રહી હતી. ત્યારે તેમના વધતા કદને માપમાં રાખવા માટે ACBને ખભે બંદૂક મુકાઇ હોય તેવું પણ બની શકે છે.

ગુજરાત ACB રોજ એક લાંચિયા સરકારી બાબુને ઝડપી રહી છે ત્યારે જ વડોદરાની ગ્રામ્યની જમીનમાં થયેલી બોગસ એન્ટ્રી દૂર કરી પુન: એન્ટ્રી માટે મામલતદાર અર્જુન વણઝારા વતી તેના નાયબ મામલતદાર જશવંત હજુરીએ રૂપિયા 75000 માંગ્યા હતા. લાંચના રૂપિયા સ્વીકારતાં જ અર્જુન વણઝારા અને જશવંત હજુરી ઝડપાઇ ગયા હતા. હાલ તો તપાસ અધિકારી પી.આર.ગેલોટે બન્નેના ઘરે સર્ચ ઓપરેશન કરી તેમને જેલના હવાલે કરી દીધા છે. ત્યારે શું ડી.જી.વણઝારાના પુત્ર સામેની આ તપાસ તટસ્થ રીતે થશે કે કેમ? તે સવાલ સૌ પોલીસકર્મીઓને સતાવી રહ્યો છે.

જો વણઝારાને સંદેશો જ આપવાનો હોત તો લાંચના રૂપિયા 75 હજાર સાથે અર્જુન વણઝારાને ઝડપી લીધા બાદ તેમની સ્કોર્પિઓમાંથી રૂપિયા 2.60 લાખ સહિત રૂપિયા 3.27 લાખ કબજે લઇ તેમના ઘરે સર્ચ ઓપરેશન ન કરાયું હોત. જે રીતે આ કેસની તપાસ ચાલી રહી છે. તે જોતાં તેમાં કોઇ મોટા માથાનું સતત મોનિટરિંગ હોય તેવું ફલિત થઇ રહ્યું છે. હવે જોવાનું એ રહ્યું કે ACBના ઓપરેશન ‘અર્જુન ‌વણઝારા’માં આગળ શું થાય છે.