મહિલા પોલીસ સ્ટેશનના લાંચ કેસમાં ખુદ ACB ભરાઈ પડી?

નવગુજરાત સમય > અમદાવાદ

મહિલા પોલીસ સ્ટેશનના લાંચ કેસમાં ખુદ ACB ભરાઈ પડી હોય તેવી સ્થિતિ આકાર લઈ રહી છે. જેમના ઘરે સર્ચ થઈ ચૂકી છે તેવા પી.આઈ. દિવ્યા રવિયાને ACB હજુ શોધી શકી નથી ત્યાં ત્રણ આરોપી જેલહવાલે થયાં છે. આ સંજોગોમાં ACBની કાર્યપદ્ધતિ અંગે અનેક ચર્ચાઓ શરૂ થઈ છે. એક મહિનાની જહેમત પછી ટ્રેપ ગોઠવાઈ તેમાં પણ કાચું કપાતાં મુળ લાભકર્તા સુધી પહોંચવામાં સમસ્યા સર્જાઈ રહી હોવાની ચર્ચા જાગી છે.

મહિલા ક્રાઈમ બ્રાન્ચમાં ACBએ કરેલી પહેલી જ ટ્રેપ હવે ચર્ચાસ્પદ બની રહી છે. ACBએ રેડ કરી ત્યારે લાંચના રૂપિયા સાત લાખમાંથી રૂપિયા છ લાખ તો મહિલા એડ્વોકેટ ઉમાબેન પાસેથી મળી આવ્યા હતા. આ પૈસા શેના હતા? કોના માટે મેળવવામાં આવ્યા હતા? આવા અનેક સવાલોના જવાબ મેળવીને ACBએ લાંચનો ગુનો પ્રસ્થાપિત કરવાનો છે. જાણકારોના મતે આ કામ આસાન નથી. ACBની ટ્રેપમાં પકડાયેલા બે મહિલા પોલીસકર્મી રમીલાબહેન, કપિલાબહેન અને વકીલ ઉમાબહેનના વધુ રિમાન્ડ ACBએ માગ્યા નહોતા. એવો મતલબ કઢાઈ રહ્યો છે કે, આરોપીઓ પાસેથી હવે વધુ વિગતો કઢાવી શકાય તેમ નથી.

હવે ચર્ચા એવી છે કે, ACBની ટીમે મહિલા ક્રાઈમ બ્રાન્ચના પી.આઈ. દિવ્યા રવિયાના ચાંદખેડા સ્થિત નિવાસસ્થાને સર્ચ કર્યું હતું. આ સર્ચમાં 5.27 લાખનું રાચરચિલું હોવાનું જણાયું છે. એક ફ્લેટ અને આટલું રાચરચિલું છેલ્લા એક દાયકાથી વધુ સમયથી પોલીસદળમાં કાર્યરત અધિકારી પાસે હોય તે વાત નવી નથી. તો પછી ACBએ સર્ચ શા માટે કર્યું?

એવી ચર્ચા છે કે, જ્યારે દરોડો પાડવામાં આવ્યો ત્યારે મુળ લાભકર્તાનું નામ કે હોદ્દો સ્પષ્ટ કરવામાં કાચું કપાઈ જતાં ACB ભરાઈ પડી હોય તેવી સ્થિતિ છે. ત્રણ આરોપીઓની પૂછપરછમાં ખુલેલી વિગતો પછી પુરાવા એકત્ર કરવાની કવાયતમાં ACB હજુ સુધી પૂર્ણરૂપે સફળ થઈ નથી.

મહિલા ક્રાઇમ બ્રાન્ચ લાંચ કેસમાં ઝડપાયેલી ત્રણેય મહિલા જેલમાં દુષ્કર્મની ફરિયાદ નહીં નોંધવા અને પતાવટ માટે 7 લાખની લાંચ લેતા ઝડપાયેલી પોલીસ કોન્સ્ટેબલ રમિલા અને કપિલ તથા વકીલ ઉમા પંચાલના રિમાન્ડ પુરા થતા સ્પે. કોર્ટમાં રજૂ કરવામાં આવી હતી. જો કે, પોલીસે તેમના વધુ રિમાન્ડ ન માગતા ત્રણેય મહિલા આરોપીઓને કોર્ટે જેલના હવાલે મોકલી આપી છે.