અમદાવાદઃ શહેરના પ્રહલાદનગર રોડ પર મારુતી હિલ્સ બંગ્લોઝમાં રહેતા એસ્ટેટ બ્રોકરને યુવતી સહિત પાંચ લોકોએ હની ટ્રેપમાં ફસાવી રૂ.10 લાખની માંગણી કરી હતી. સોલા પોલીસે આ મામલે ફરિયાદના આધારે પાંચ યુવકો અને યુવતી સહિત 6 વ્યક્તિની ધરપકડ કરી છે. સેટેલાઈટમાં મારૂતી હિલ્સ બંગ્લોઝમાં રહેતા મનન પરીખ(ઉં.38) એસ્ટેટ બ્રોકર તરીકે વ્યવસાય કરે છે. ગત 12 જૂનનાં રોજ પરીખે અજાણ્યા નંબરથી એક યુવતીનો ફોન આવ્યો હતો. બાદમાં મેસેજથી વાતચીત શરૂ થઈ હતી. 16 જૂનનાં રોજ યુવતીએ પરીખને મળવા માટે બોલાવ્યા હતા. એસજી હાઈવે પર આવેલ એક પ્રાઈવેટ હોસ્પિટલ પાસે બંને મળ્યા હતા. જે બાદ યુવતીએ પરીખની કારમાં બેસીને ફરવાની ઇચ્છા વ્યક્ત કરતા બંને જણા 45 મિનિટ સુધી જોડે ફર્યા હતાં.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:
પરીખે યુવતીને જે જગ્યાથી બેસાડી ત્યાં પહોંચીને કાર ઉભી કરતા જ એક નંબર પ્લેટ વગરની કારમાં 4થી 5 જેટલા શખ્સો આવ્યાં હતાં. પરીખ સાથે ઝગડો કર્યો હતો ત્યારબાદ બળજબરી પૂર્વક પોતાની કારમાં બેસાડી અડાલજ પાસે લઈ ગયા હતાં. અહીં પહોંચ્યા બાદ આ લોકોએ પરીખને માર મારી તેનો વીડિયો બનાવ્યો અને સમાધાનનાં રૂ.10 લાખ માગ્યા હતાં. જે બાદ પરીખ પાસે રહેલા રોકડા રુ. 75000 અને 1.25 લાખ લઈ લીધા હતા. આ ઘટનાનાં 5 દિવસ બાદ આરોપીઓએ ફરી ફોન કરીને બીજી રકમની માંગણી કરતા પરીખે આ અંગે ઘરે પત્ની સાથે સમગ્ર બનાવ અંગે વાતચીત કરી હતી જે બાદ કપલે સોલા પોલીસ સ્ટેશનમાં ફરિયાદ આપી હતી. સોલા પોલીસે જણાવ્યું કે આરોપીઓએ આ ગુનાને અંજામ આપવા માટે એકથી વધુ કારનો ઉપયોગ કર્યો હતો આ કારના રજિસ્ટ્રેશન નંબરના આધારે અને સીસીટીવી ફૂટેજના આધારે તમા આરોપીઓને ઝડપી પાડ્યાં
પોલીસે જણાવ્યા મુજબ આરોપીઓની ઓળખ આકાશ દેસાઇ (ઉ. 25, રહે. ઘાટલોડીયા), મેહુલ દેસાઇ (ઉ. 23, રહે. ચાંદખેડા), જયેશ દેસાઇ (ઉ. 23, રહે. અસારવા), શુભમ દેસાઇ (ઉ. 21, રહે. ચાંદખેડા), વરૂણ દેસાઇ (ઉ. 21, રહે. ચાંદલોડીયા), યુવતી શિવાની સાધુ (ઉ. 25, રહે. ગાંધીનગરના શેરથાગામ) થઈ છે.