અમદાવાદઃ નવો કીમિયો, કેશવાનમાં ગનમેન સાથે દારૂની હેરાફેરી

I am Gujarat

કેશવાનમાં દારૂની હેરાફેરી

અમદાવાદઃ ગુજરાતમાં થોડા સમય પહેલા જ દારૂબંધીના કાયદામાં ફેરફાર કરવામાં આવ્યો છે. દારૂની હેરાફેરી માટે બુટલેગરો નવી નવી તરકીબો અજમાવી રહ્યા છે. નરોડામાં ઝડપાયેલા બે શખસો હરિયાણાથી કેશવાનમાં દારૂ ભરીને અમદાવાદ હેરફેર કરતા હતા. કોઈને શંકા ન જાય તે માટે કેશવાનમાં સિક્યોરિટી ગાર્ડ પણ ગન સાથે હતો.

પોલીસ પણ ચોંકી ગઈ

પોલીસ પાસેથી મળી રહેલી માહિતી મુજબ મૂળ હરિયાણાના રહેવાસી પ્રવિણ કુમારખાતી અને રાજીવકુમાર જાટ હરિયાણાથી કેશવાનમાં દારૂભરીને અમદાવાદ આવી રહ્યા હતા. આ સમયે નરોડા પોલીસે બાતમીના આધારે જ્યોતિ હોટલ પાસે તેમને અટકાવ્યા. તપાસ દરમિયાન જ્યારે પોલીસે ગાડીની તપાસ કરી તો તેઓ પણ ચોંકી ગયા હતા.

11 લાખનો દારૂ જપ્ત

દારૂની હેરાફેરી કરતા આ આરોપીઓએ કેશવાનનો ઉપયોગ કરી કેશ મૂકવાની જગ્યાએ દારૂની બોટલો પેકિંગ કરીને મૂકી હતી. જ્યારે આ બોટલો બહાર કાઢવામાં આવી તો તે કુલ 1200 નંગ હતી. જેની અંદાજીત કિંમત 11 લાખ રૂપિયા હોવાનું સામે આવી રહ્યું છે.

ગનમેન પણ પાછળ બેઠો હતો

સામાન્ય રીતે કેશવાનનો ઉપયોગ રોકડ લાવવા લઈ જવા માટે કરવામાં આવે છે. જેથી આ વાનમાં ગન સાથે સિક્યોરિટી ગાર્ડ હોય છે. આ બુટલેગરોએ કોઈને શંકા ન જાય તે માટે કેશવાનમાં પાછળ સિક્યોરિટી ગાર્ડને ગન સાથે બેસાડી રાખ્યો હતો.