મોઢુ ખોલ્યું તો નીકળ્યું 4.5 લાખનુ સોનું, એરપોર્ટ પર કસ્ટમ અધિકારીઓ પણ ચોંકી ગયા

ઘણીવાર એરપોર્ટ પર ચેકિંગ દરમિયાન ચોંકાવનારી વસ્તુઓ સામે આવતી હોય છે. તાજેતરમાં જ બેંગ્લોરના કેમ્પેગૌડા ઈન્ટરનેશનલ એરપોર્ટ પર કસ્ટમ અધિકારીઓએ 42 વર્ષીય સોનાના તસ્કરની અટકાયત કરી છે. આ તસ્કર પોતાના મોઢામાં સોનું છુપાવીને લાવવાનો પ્રયત્ન કરી રહ્યો હતો. એરપોર્ટના સૂત્રોએ ગુરુવારના રોજ આ વાતની જાણકારી આપી છે.

આરોપી તસ્કર ચેન્નાઈનો રહેવાસી છે અને તે બુધવારે સાંજે દુબઈથી બેંગ્લોર એરપોર્ટ ઉતર્યો હતો. તેણે સાડા ચાર લાખ રુપિયાની કિંમતના 100 ગ્રામ સોનાના બે ટુકડા છુપાવ્યા હતા. બેંગ્લોર કસ્ટમમાં એર ઈન્ટેલિજન્સ યુનિટ દ્વારા આરોપીને રોકવામાં આવ્યો અને પૂછપરછ કરવામાં આવી. અધિકારીઓને લાગ્યું કે, આરોપીને વાત કરવામાં તકલીફ પડી રહી છે. ત્યારપછી તેમણે મોઢાની તપાસ કરી તો અંદરથી સોનાના ટુકડા મળી આવ્યા.

અધિકારીઓએ તેના પર કસ્ટમ ડ્યુટીથી બચવાનો કેસ દાખલ કર્યો છે. અધિકારીઓને તસ્કરે જે ફ્લાઈટમાં પ્રવાસ કર્યો તેમાં 49.6 લાખ રુપિયાની કિંમતના એક કિલોગ્રામથી વધારે વજનના 15 સોનાના ટુકડા પણ મળી આવ્યા. હવે અધિકારીઓ તપાસ કરી રહ્યા છે કે શું આ જ વ્યક્તિએ સોનાના ટુકડા ફ્લાઈટમાં મૂકી દીધા હતા. શક્ય છે કે તે દુબઈથી સોનુ લઈને આવ્યો હોય અને કોઈ કારણોસર ફ્લાઈટમાં જ મૂકીને બહાર નીકલી ગયો હોય.

ફ્લાઈટ બુધવારના રોજ દુબઈથી બેંગ્લોર લેન્ડ થઈ હતી. આરોપી વ્યક્તિએ અધિકારીઓને જણાવ્યુ હતું કે તે 14 ઓક્ટોબરના રોજ ચેન્નાઈથી દુબઈ ગયો હતો. કસ્ટમ વિભાગ દ્વારા આ પ્રકારના નેટવર્કને તોડવા માટે આગળની તપાસ શરુ કરી છે.