ફાટેલાં પ્રિસ્ક્રિપ્શનને આધારે પોલીસે હત્યારાને ઝડપ્યો, તપાસમાં સામે આવ્યું ચોંકાવનારું કારણ

મહારાષ્ટ્રના થાણે જિલ્લાના ભિવંડીમાં પોલીસને બેગની ક્ષત વિક્ષત હાલતમાં એક લાશ મળી આવી હતી. લાશની પાસેથી પોલીસને માત્ર તેના ખિસ્સામાં રહેલું એક ફાટેલું ડોક્ટરનું પ્રિસ્ક્રિપ્શન મળી આવ્યું હતું. અને આ પ્રિસ્ક્રિપ્શનના આધારે જ પોલીસે હત્યાનો ભેદ ઉકેલી કાઢ્યો હતો. પોલીસે આ મામલે 27 વર્ષીય સલમાન શૈખ, 30 વર્ષીય તસલિમ અંસારી અને 26 વર્ષીય બિલાલ અંસારીની ધરપકડ કરી છે. આરોપીઓની ઉલટતપાસમાં ચોંકાવનારી વિગતો સામે આવી હતી. હત્યાના મુખ્ય આરોપી તસલિમના મૃતકની પત્ની સાથે આડા સંબંધો હતા. અને પતિ તેમાં આડખીલીરૂપ બનતો હોવાને કારણે તસલિમે પોતાના મિત્રો સાથે મળીને પતિની હત્યા કરી દીધી હતી. મૃતકની પત્ની સાથે હતું અફેર, કાંટારૂપ પતિને હટાવવા ઘડ્યો હત્યાનો પ્લાન

પોલીસ તપાસમાં સામે આવ્યું હતું કે, મૃતક વ્યક્તિનું નામ 45 વર્ષીય અરમાન અલી શાહ હતું. અને તેની હત્યાના મુખ્ય આરોપી તસલિમ અંસારીનું અરમાનની પત્ની સાથે અફેર ચાલતું હતું. પોલીસે જણાવ્યું હતું કે, અરમાન આ સંબંધની વિરોધમાં હતો. જેને કારણે તસલિમે પોતાના મિત્રો સલમાન અને બિલાલની મદદથી હત્યાનું કાવતરું ઘડ્યું હતું.

યુવકના ખિસ્સામાંથી મળી આવ્યું ડોક્ટરનું પ્રિસ્ક્રિપ્શન, તેના આધારે પોલીસે હત્યારા સુધી પહોંચી

પોલીસે જણાવ્યું કે, 20 જાન્યુઆરીના રોજ કામ્બા ગામ પાસે બ્રિજની નીચે એક બેગની અંદરથી બેગની અંદર અનેક ઈજાઓ સાથે ક્ષત વિક્ષત હાલતમાં લાશ મળી આવી હતી. અને એકમાત્ર પુરાવો મૃતકના પોકેટમાં મળી આવેલ પ્રિસ્ક્રિપ્શન હતું. આ મામલે પોલીસે તપાસનો ધમધમાટ શરૂ કર્યો હતો અને અંતે પ્રિસ્ક્રિપ્શનના આધારે ડોક્ટર સુધી પહોંચ્યા હતા. જો કે, ડોક્ટર મૃતકની ડેડ બોડી ઓળખી શક્યો ન હતો. પણ ડોક્ટરે પોલીસને જણાવ્યું હતું કે, અહીં રહેતી એક મહિલા તેના પતિની શોધખોળ કરી રહી હતી. અને આ મામલે તે ડોક્ટર પાસે પણ આવી હતી. જે બાદ પોલીસે આ સમગ્ર હત્યાકાંડ ઉકેલી કાઢ્યો હતો.