ઓવરલોડ વાહનોની તપાસ વ્યવસ્થા ના હોવાના મુદ્દે રિટ

નવગુજરાત સમય > અમદાવાદ

– હાઇવે પર દોડતા ઓવરલોડેડ વાહનોની યોગ્ય તપાસ માટેની કોઇ વ્યવસ્થા ના હોવાના મુદ્દે હાઇકોર્ટમાં રિટ થઇ છે. હાઇકોર્ટના ચીફ જસ્ટિસ આર. સુભાષ રેડ્ડી અને જસ્ટિસ વી.એમ. પંચોલીની ખંડપીઠે આ રિટમાં રાજ્ય સરકારને જરૂરી સૂચન લઇ જવાબ રજૂ કરવાનો આદેશ કર્યો છે. અરજદાર રાજેશકુમાર વતી એડ્વોકેટ એમ. એન. મારફતિયાએ આ રિટ પિટિશનમાં એ મતલબના મુદ્દા ઉપસ્થિત કર્યા છે કે,’હાઇવે પર ટ્રક અને અન્ય વાહનો તેમને મળેલી મંજૂરી કરતાં વધુ માલ ભરીને પસાર થતાં હોય છે. આવા વાહનોની ચકાસણી અને તેમાં મંજૂરી કરતાં કેટલો વધારે સામાન છે તેનું વજન કરવાના પુરતા સાધનો ટોલ નાકાઓ ઉપર હોતા નથી. તેથી નિયમનો ભંગ કરનારા પાસેથી દંડ પેટે નાણાં પણ લઇ શકાતા નથી.’ વધુમાં રજૂઆત કરાઈ છે કે,’રાજ્ય સરકારે આ સંદર્ભે એક જાહેરનામું કર્યું છે અને સુપ્રીમ કોર્ટની પણ નિશ્ચિત ગાઇડલાઇન છે. તેમ છતાંય કોઇ અસરકારક વ્યવસ્થા ન ગોઠવીને તેનું ઉલ્લંઘન કરવામાં આવે છે.’