નિવૃત્ત બેન્ક મેનેજરને વિદેશી ‘ફેસબૂક ફ્રેન્ડ’ ચૂનો ચોપડી ગઈ

નવગુજરાત સમય > અમદાવાદ

તમે ગમે તેટલા સતર્ક હો, લાલચમાં આવી ગયા એટલે ફસાયા સમજો. આવો જ અનુભવ નિવૃત્ત બેન્ક મેનેજરને થયો છે. વિદેશી ફેસબૂક ફ્રેન્ડ અને ટોળકીએ નાગપુરથી જડીબુટ્ટી ખરીદીને લંડનમાં વેચાણ કરી નફો કમાવવાની લાલચ આપીને ~ 4.50 લાખની છેતરપિંડી કર્યાની ફરિયાદ ઘાટલોડિયા પોલીસમાં નોંધાવાઈ છે.

મેમનગરના સર્જન ટાવરમાં રહેતા 68 વર્ષના સતિષકુમાર મલકેશ્વરદાસ ધવન વર્ષ 2008માં ઓરીએન્ટલ બેન્ક ઓફ કોમર્સના ચીફ મેનેજરપદેથી નિવૃત થયા હતા. જુલાઈ-2016માં તેમણે ફેસબૂક એકાઉન્ટમાં ‘જનિતા મોરીસ’ નામની ફ્રેન્ડ રિક્વેસ્ટ એક્સેપ્ટ કરી હતી. બન્ને ફેસબૂક અને ઈ-મેઈલથી સંપર્કમાં હતા અને જનિતા હાલ લંડનમાં સ્થાયી હોવાનું કહેતી હતી. તા. 2-8-2016ના રોજ જનિતાએ ફેસબૂક એકાઉન્ટમાં મેસેજ કર્યો કે, તે ભારત આવવાની છે અને અમદાવાદમાં રોકાણ માટે હોટલનો રૂમ બૂક કરાવવો છે પણ ત્યાંથી મની ટ્રાન્સફર થતા નથી. જનિતાના કહેવા મુજબ, સતિષભાઈએ 16 હજાર મુંબઈના ICICI બેન્કના એકાઉન્ટમાં જમા કરાવ્યા હતા.

બાદમાં જનિતાએ તેના પિતા ક્રિસ્ટોફ સાથે વાત કરાવી હતી. તેમણે નાગપુરમાં એક્રોમાઈઝન ફૂડ નામની જડીબુટ્ટી (હર્બલ મેડિસિન) મળે છે તેની લંડનમાં ખૂબ માંગ છે. આ દવાના વેચાણથી ખૂબ નફો થશે તેમાં 40 ટકા આપવાની વાત કરી હતી. આ માટે નાગપુરમાં એલજાક હર્બલ્સમાં ફોન કરી તપાસ કરવાનું કામ સતિષભાઈને સોંપાયું હતું. જનિતાએ આપેલા નંબર ઉપર વાત કરતાં શ્રદ્ધા મહેતા નામની યુવતીએ જડીબુટ્ટીના દોઢ કિલો પેકીંગના ~ 2.65 લાખ અને પાંચ કિલોના 8.75 લાખ ભાવ હોવાનું કહ્યું હતું. વિદેશમાં આ પ્રોડક્ટના અનુક્રમે 6000 અને 20 હજાર યુ.એસ. ડોલર્સ ભાવ હોવાનું જણાવ્યું હતું.

વાત શંકાસ્પદ લાગતાં સતિષભાઈએ પુરી રકમ ભરવાનો ઈનકાર કર્યો હતો. પરંતુ, પોતે પૈસા જમા કરાવ્યા હોવાની રસિદો મોકલીને જડીબુટ્ટી ખરીદી અને કુરિયરમાં માલ મગાવવાના બહાને ટૂકડે ટૂકડે કુલ ~4,50,500 અલગ અલગ ખાતામાં જમા કરાવાયા હતા. બાદમાં, બધાના ફોન બંધ થઈ જતાં સતિષભાઈએ નાગપુરમાં રહેતા પુત્ર પાસે તપાસ કરાવતાં આવી કોઈ કંપની હતી જ નહીં! આ પ્રકારે ઠગ ટોળકી આ નાણાં ઓળવી ગયાની ફરિયાદ ઘાટલોડિયા પોલીસમાં નોંધાઈ છે. પીઆઈ એસ.એમ. પટેલે આ કેસની તપાસ હાથ ધરી છે.