ડ્રાય સ્ટેટ! સાત જ દિવસમાં રૂ. ત્રણ કરોડનો દારૂ પકડાયો

નવગુજરાત સમય > અમદાવાદ

ગાંધીનું ગુજરાત ખરેખર ‘ડ્રાય સ્ટેટ’ છે? આવો સ્વાભાવિક સવાલ ઊભો થાય તેવી કાર્યવાહી છેલ્લા સાત દિવસમાં થઈ છે. મુખ્યમંત્રી વિજય રૂપાણીએ IPS ઓફિસર્સ સાથે મીટિંગ યોજીને દારૂ-જુગારના મુદ્દે સમાધાનવૃત્તિ નહીં ચલાવાય તેવી તાકીદ કરી.જેના પગલે રાજ્યના પોલીસ વડા પી.પી. પાન્ડેયએ સાત દિવસની પ્રોહિબિશન ડ્રાઈવ યોજવાનો રાજ્યભરની પોલીસને આદેશ કર્યો.

તા. ૩ સપ્ટેમ્બરથી સાત દિવસ એટલે કે તા. ૧૦ સપ્ટેમ્બર સુધીમાં રાજ્યમાં ૫૧૦૦થી વધુ કેસ કરી પોલીસે ત્રણ કરોડથી વધુ કિંમતનો દેશી- વિદેશી દારૂનો જથ્થો પકડી પાડ્યો છે. પોલીસે ૬૬૦૦થી વધુ આરોપીને ઝડપી લીધાં છે અથવા નામ ખૂલ્યાં છે. અમદાવાદ શહેરમાં જ ૧૬.૮૫ લાખનો દારૂનો જથ્થો પકડાયો છે. ગ્રામ્ય વિસ્તારોની વાત કરીએ તો સૌથી વધુ કેસ સાથે સુરત રેન્જ અગ્રેસર રહી છે. જો કે, કડક કામગીરીની આડઅસર હોય તેમ સુરત જિલ્લામાં લઠ્ઠાકાંડ સર્જાયો છે.

રાજ્યમાં ઈંગ્લિશ કે દેશી દારૂની નશાખોરી કારણે હજારો પરિવાર તબાહ થાય છે. આર્થિક પાયમાલી સર્જતા દારૂના દૈત્યને નાથવા માટે ગુજરાત સરકાર અને પોલીસ તંત્રએ ડ્રાઈવ યોજી હતી. આ ડ્રાઈવ દરમિયાન પોલીસે ધારણા મુજબના પરિણામ મળ્યાં છે. દારૂના નશામાં માનતો એક વર્ગ દારૂબંધીમાંથી મુક્તિની તરફેણ કરતો રહે છે પણ દારૂબંધીની કડક અમલવારી હોવી જોઈએ તેમ માનનારો વર્ગ ખૂબ મોટો છે.

ક્યાંથી કેટલો ઈંગ્લિશ દારૂ પકડાયો?
શહેર/રેન્જ કેસ બોટલ કિંમત આરોપી
અમદાવાદ શહેર 38 7278 16.85 લાખ 52
રાજકોટ શહેર 8 1085 2.20 લાખ 9
સુરત શહેર 32 2870 2.90 લાખ 53
વડોદરા શહેર 6 196 19,150 6
અમદાવાદ રેન્જ 27 9126 15.99 લાખ 37
ગાંધીનગર રેન્જ 33 26885 40.65 લાખ 56
રાજકોટ રેન્જ 28 1534 4.97 લાખ 35
બોર્ડર રેન્જ 29 31207 51.59 લાખ 33
જુનાગઢ રેન્જ 27 1106 3.21 લાખ 36
વડોદરા રેન્જ 73 48331 53.89 લાખ 90
સુરત રેન્જ 197 79829 86.55 લાખ 229
રેલવે 30 843 45,680 36
*દેશી દારૂ 4624 27074 5.48 લાખ 5973
લિટર
(* દેશી દારૂના સમગ્ર રાજ્યમાં પડાયેલા દરોડાની સંયુક્ત વિગત રજૂ કરાઈ છે.)

સુરતના લઠ્ઠાકાંડમાં 17 મોત: પોલીસ ડ્રાઈવની આડઅસર
સુરત જિલ્લામાં લઠ્ઠાથી 17 લોકોનો ભોગ લેવાઈ ચૂક્યો છે અને DGP કચેરીથી ખાસ તપાસ ટીમ પણ મોકલાઈ છે. પોલીસ તંત્રમાં એવી ચર્ચા છે કે જ્યારે આવી મોટી ડ્રાઈવ યોજાઈ છે ત્યારે ક્યાંક ને ક્યાંક લઠ્ઠાકાંડની સ્થિતિ સર્જાય જ છે. પોલીસ કડક કાર્યવાહી કરે એટલે દેશી દારૂ ગાળી શકાતો નથી. લોકો કેમિકલ અથવા તેના બનેલા દારૂનું સેવન કરે એટલે લઠ્ઠાકાંડ સર્જાતો હોય છે.