અયુબ હત્યા કેસ: એક પોલીસ સકંજામાં પાંચને પકડવા દસ ટીમો કાર્યરત

નવગુજરાત સમય, અમદાવાદ
કથિત ગૌરક્ષકો દ્વારા વટવાના અયુબની પ્રહલાદનગર પાસે હત્યા કરવાના કેસમાં SIT દ્વારા ધવલ નામના એક શખ્સની અટકાયત કરાઈ છે. પોલીસને જાણવા મળ્યું હતુ કે, ધવલ સહિત કુલ છ લોકોએ અયુબ પર હુમલો કર્યો હતો. હુમલાનું કારણ અયુબ છાપીથી ઈન્ડિંગોકારમાં ક્રુરતા પૂર્વક બે ગૌવંશને બાંધીને લઈ જઈ રહ્યો હતો અને આ ઢોર કતલ ખાને લઈ જવાઈ રહ્યાની શંકાથી કથિત ગૌરક્ષકોએ પીછો કર્યો હતો. અકસ્માત બાદ થયેલા હુમલામાં અયુબનું મોત નિપજ્યું હતુ. આ ઘટના બાદ કહેવાતા ગૌરક્ષકો ભૂગર્ભમાં ઉતરી ગયા છે. બીજી તરફ પોલીસે બળદ અને વાછરડું મંગાવનારા રિલિફ રોડ સ્થિત એક શખ્સની પણ તપાસ શરૂ કરી છે.
સૂત્રોના જણાવ્યાં અનુસાર, ક્રાઈમ બ્રાન્ચના ડીસીપી દીપન ભદ્રન અને સ્પેશિયલ ઓપરેશન ગ્રુપના એ.સી.પી બી.સી સોલંકીની અધ્યક્ષતામાં બનેલી એસ.આઈ.ટીની ટીમ દ્વારા ધવલની અટકાય કરી છે. તેની પુછપરછ કરીને પોલીસ ગમે ત્યારે તેની સત્તાવાર ધરપકડ કરી શકે છે. આ ધવલ સહિત કુલ છ શખ્સોએ અયુબ પર હુમલો કર્યો હોવાની વિગતો પોલીસને મળી છે. પોલીસ આ ધવલ દ્વારા અન્ય આરોપીઓની પણ તપાસ કરી રહી છે. એસ.આઈ.ટીના સૂત્રોએ આશા વ્યક્ત કરી છે કે, ટુંક જ સમયમાં કહેવાતા ગૌરક્ષકોને પકડી પાડવામાં આવશે. હાલ ફરાર આરોપીઓને પકડી પાડવા માટે એસ.આઈ.ટીના અધિકારીઓની આગેવાનીમાં કુલ દસ ટીમો તપાસ કરી રહી છે.
સૂત્રોએ ઉમેર્યું હતુ કે, આ ઘટનામાં બીજો એક કેસ એનિમલ ક્રુઆલીટી એક્ટનો હતો. અયુબ અને અમીરની કારમાં ભરેલા બળદ અને વાછરડાને કોણે મંગાવ્યાં હતા તે અંગે પણ તપાસ કરાઈ રહી છે. પોલીસ આ તપાસમાં રિલિફ રોડના એક શખ્સને રડારમાં લીધો છે અને ટુંક સમયમાં તેની વિરૂધ્ધ પણ કાર્યવાહી કરવામાં આવશે તેમ સૂત્રોએ ઉમેર્યું હતુ.


ઉનાકાંડના પીડીતોએ અયુબના પરિવારની મુલાકાત લીધી
સૂત્રોના જણાવ્યાં અનુસાર, કથિત ગૌરક્ષકોના હુમલામાં મોતને ભેટેલા અયુબના પરિવારને સાંત્વના આપવા ઉનાકાંડના પીડીતો મંગળવારે રાત્રે અયુબના વટવા સ્થિત ઘરે પહોંચી ગયા હતા. કુલ સાત સભ્યોનું ગ્રુપ અયુબના ઘરે પહોંચ્યું હતુ અને પરિવારને સાંત્વાના આપી હતી. આ સભ્યો બુધવારે કેરાલા એક કાર્યક્રમમાં ભાગ લેવા મોડી રાતે રવાના થયું હોવાનું સુત્રોએ ઉમેર્યું હતુ.